На тэрыторыі Дома культуры ў Салігорскім раёне адбыўся выбух

Абрынуўся будынак кацельні.

Учора ўдзень выратавальнікам паступіла паведамленне пра тое, што адбыўся разрыў ацяпляльнага катла і абрынанне канструкцый кацельні на тэрыторыі Дома культуры ў вёсцы Хорастава Салігорскага раёна, паведамляе onliner.by.

Калі да месца выкліку прыбылі падраздзяленні МНС, высветлілася, што адбылося разбурэнне будынка кацельні без наступнага гарэння. Качагар у момант выбуху знаходзіўся на тэрыторыі і займаўся нарыхтоўкай дроў, ён не пацярпеў, паведамляецца на сайце МНС.

Пазней падчас высвятлення абставінаў стала вядома, што пры правядзенні электрамантажных работ у Доме культуры а 13.00 кацельня была абясточаная. Папярэдне ў выніку спынення вадзяной помпы ў катле, які працаваў, спынілася цыркуляцыя вады, што і прывяло да яго разрыву. Былі пашкоджаныя сцены, перакрыцце і дах будынка кацельні. Пацярпелых няма.