Лукашэнка - чыноўнікам: Не будзеце хадзіць па пяць кіламетраў - доўга не пражывяце

Дыктатар загадаў чыноўнікам хадзіць на ўсе хакейныя і футбольныя матчы.

Лукашэнка сёння на сустрэчы з актывам горада Баранавічы і Баранавіцкага раёна параіў чыноўнікам папулярызаваць здаровы лад жыцця і заняткі спортам на асабістым прыкладзе, піша БелТА.

"Старшыня павінен быць на кожным матчы або праз матч: на хакеі і на футболе. Вы павінны там сядзець і за сабой цягнуць людзей. Дзеці павінны бачыць, што там такія ж хлопцы бегаюць. Яны павінны імкнуцца. А калі мы не будзем паказваць прыклад, яны гэтым займацца не будуць", - сказаў Лукашэнка.

Ён пацікавіўся ў чыноўнікаў, якімі тыпамі спорту яны займаюцца, аднак не пачуў зразумелых адказаў. Дыктатар ім параіў хоць бы хадзіць па некалькі кіламетраў на дзень. "Гэта здаецца жартам, але не будзеце хадзіць па пяць кіламетраў як мінімум, доўга не пражывяце. Таму вы жартуйце, як хочаце, але гэта вельмі важна для кожнага", - падкрэсліў правадыр.