Адабраную нерухомасць Аршанскага авіярамонтнага завода перадалі аэрапорту Менск

Маёмасць забралі ва ўкраінскай кампаніі «Матор Січ».

Нерухомасць ААТ «Аршанскі авіярамонтны завод» перадалі РУП «Нацыянальны аэрапорт Менск». Пастанова Савета Міністраў аб гэтым апублікаваная на Нацыянальным прававым Iнтэрнэт-партале, піша tut.by.

Дакумент прадугледжвае, што маёмасць бязвыплатна пяройдзе з уласнасці адкрытага акцыянернага таварыства ва ўласнасць Рэспублікі Беларусь. Яго перададуць у гаспадарчае вядзенне Нацыянальнага аэрапорта Менск.

Гаворка пра лётную паласу, частка дарожкі кіравання, стаянкі паветраных суднаў, ліўневай каналізацыі і агароджы аэрадрома. Таксама аэрапорту пяройдуць два капітальныя будынкі.

Нагадаем, у 2012 годзе па распараджэнні Лукашэнкі дзяржпакет акцый ААРЗ купілі ўкраінская кампанія «Матор Січ», падкантрольная Вячаславу Багуслаеву (блізу 60% акцый), і «Сістэмы інвестыцый і інавацый» Аляксандра Садовага (амаль 40%). Беларуская і ўкраінская кампаніі планавалі на працягу 2012-2016 гадоў інвеставаць у рэканструкцыю, мадэрнізацыю вытворчых магутнасцяў ААРЗ блізу 12 млн даляраў, стварыць звыш 300 рабочых месцаў. Інвестары мелі намер укласці сур'ёзныя сродкі ў развіццё сацыяльнай сферы завода і гарадскога пасёлка Балбасава, дзе знаходзіцца завод. Але не ўсё намечанае ўдалося рэалізаваць.

Завод моцна падкасіў канфлікт Расеі з Украінай, у выніку чаго аказаліся цалкам заблакаваныя пастаўкі ў РФ. Са слоў іншых крыніц, на прадпрыемстве адбіўся і асабісты канфлікт паміж Багуслаевым і Садовым. У другой палове 2017 года становішча на ААРЗ пагоршылася.