Брытанскі міністр зняпраўдзіў чуткі аб падрыхтоўцы «путчу» супраць Тэрэзы Мэй

Міністр фінансаў Філіп Хамонд выступіў з заявай.

Міністр фінансаў Вялікай Брытаніі Філіп Хамонд зняпраўдзіў чуткі пра тое, што чальцы ўрада рыхтуюць путч з мэтай зрынання прэм'ер-міністра Тэрэзы Мэй на фоне рознагалоссяў аб Brexit, паведамляе dw.com.

«Не, я не думаю, што гэта так. Змена прэм'ер-міністра не дапаможа. Разважаць аб змене гульцоў на дошцы цяпер - гэта, шчыра кажучы, самалюбаванне. Брытанія павінна знайсці шлях спарадкаванага выхаду з ЕЗ замест таго, каб імкнуцца зрынуць Тэрэзу Мэй», - сказаў Хамонд у інтэрв'ю тэлеканалу Sky ў нядзелю, 24 сакавіка.

Кіраўнік брытанскага Мінфіна адмаўляў, што ён спрабуе зрабіць часовым прэм'ерам кіраўніка сакратарыята кабінета міністраў Дэвіда Лідынгтана, які фактычна з'яўляецца намеснікам Тэрэзы Мэй. «Не, гэта не так», - падкрэсліў ён.

Раней штотыднёвік The Sunday Times паведаміў, што Мэй губляе падтрымку ва ўласных шэрагах, і 11 чальцоў кабінета гатовыя адвярнуцца ад яе. У паведамленні адзначалася, што ў пераемнікі Тэрэзе Мэй разглядаюцца некалькі кандыдатаў, у тым ліку Лідынгтан, міністр аховы навакольнага асяроддзя Майкл Гоув і кіраўнік МЗС Джэрэмі Хант.

У інтэрв'ю Sky Філіп Хамонд сказаў, што ён аддае сабе справаздачу ў тым, што парламенту не ўдасца сабраць большасць галасоў у падтрымку ўзгодненай Мэй дамовы аб умовах Brexit і тады, з ягоных слоў, парламенту «давядзецца вызначаць, за што ён выступае, а не толькі супраць чаго».

Магчымасць паўторнага рэферэндуму

На пытанне аб магчымых опцыях для Brexit, Хамонд выказаў сумнеў у тым, што большасць дэпутатаў прагаласуе за правядзенне паўторнага рэферэндуму, аднак назваў такую опцыю цалкам разумнай. «Зразумела, што калі Палата Абшчын адхіліць складзеную Мэй угоду, то ў найбліжэйшыя дні будзе магчымасць паспрабаваць сабраць большасць у падтрымку іншай прапановы, якую яна агучыць», - сказаў Хамонд.