Пісьменнік Віктар Сувораў: Калі Пуцін сунецца ў Беларусь - мала яму не падасца
30- 25.03.2019, 13:52
- 67,916
Беларускі народ мае традыцыі партызанскай вайны.
Заява пісьменніка Віктара Суворава прагучала падчас ягонага інтэрв'ю ў праграме «Гордон», якую вядзе журналіст Зміцер Гардон на тэлеканале «112 Україна», паведамляе «Еўрарадыё».
«Я думаю, што Беларусь - гэта вельмі важная і, магчыма, апошняя надзея Пуціна. Ён павінен дзесьці ваяваць», - выказаў меркаванне Сувораў, які раней быў супрацоўнікам савецкіх спецслужбаў. На ягоную думку, пасля таго, як Украіна абараніла свае інтарэсы і спыніла наступ Расеі, Пуцін вымушаны шукаць новую тэрыторыю. Ёю можа стаць Беларусь.
Але ў Беларусі, калі Пуцін туды сунецца, мала яму не падасца, мяркуе Сувораў. Беларускі народ мае традыцыі партызанскай вайны.
Тэма Беларусі з 14.28
«Там вельмі многія людзі разумеюць, Беларусь на баку Украіны. Беларускі народ - я чытаю тут беларусаў, п'ём гарэлку разам - яны ўсе за Украіну. Беларусы - за Украіну, гэта я дакладна табе кажу, яны не за Расею. І калі там штосьці пачнецца, то гэта, напэўна, апошні шанец Пуціна», - мяркуе пісьменнік.
Віктар Сувораў (сапраўднае імя Уладзімір Рэзун) - былы супрацоўнік Галоўнай выведвальнай управы СССР. У 1978 годзе ён папрасіў прытулку ў Вялікай Брытаніі. Найбольшую вядомасць аўтару прынеслі дакументальна-публіцыстычныя кнігі пра СССР напярэдадні і падчас Другой сусветнай вайны (напрыклад, «Ледакол») і савецкія спецслужбы (аўтабіяграфічная кніга «Акварыум»).