Лукашэнка даручыў Качанавай за тыдзень знайсці замену віцэ-прэм'еру Русаму

Дыктатар заявіў, што калі замену не знойдуць, то на месца Русага пойдзе сама Качанава.

Лукашэнка даручыў сваёй адміністрацыі ўнесці прапановы аб кандыдатурах на пасаду свайго памочніка ў Магілёўскай вобласці і віцэ-прэм'ера (цяпер гэтыя пасады займаюць Генадзь Лаўранкоў і Міхаіл Русы - заўв.).

Гэтага дыктатар запатрабаваў падчас наведвання сельгаспрадпрыемства «Газавік-Сіпакова» ў аграгарадку Дабрэйка Шклоўскага раёна, піша БелТА.

Лукашэнка застаўся незадаволеным развіццём сельскай гаспадаркі ў Магілёўскай вобласці, якая паводле паказчыкаў знаходзіцца на апошніх месцах. «Цэлы віцэ-прэм'ер, якi загадвае сельскай гаспадаркай, курыруе Магілёўскую вобласць, мой упаўнаважаны. Памочнік зубы праеў на сельскай гаспадарцы і Магілёўскай вобласці. Губернатар самы прасунуты. І вы займаеце апошняе месца. Якую я з гэтага павінен рабіць выснову?» - спытаў Лукашэнка.

«Тыдзень тэрміну на ўнясенне прапановы, бо пойдзеце самі сюды працаваць, - папярэдзіў ён кіраўніцу сваёй адміністрацыі Наталлю Качанаву. - Я вас сюды пасылаў што да кадраў - вы разбіраліся ўсю зіму, я вас папярэджваў аб сітуацыі тут. Але сітуацыя не мяняецца. Мне гэтыя абяцанні не патрэбныя».