20 красавiка 2019, Субота, 2:18
За нашу і вашу свабоду!
Рубрыкі

«Страшна працаваць на кіроўных пасадах»

12
АЛЯКСЕЙ ЯСЬКОЎ
ФОТА: TUT.BY

Начальнік вайскова-медыцынскай управы Мінабароны распавёў, як у СІЗА прапаноўвалі супрацоўніцтва.

Суд Фрунзенскага раёну прадаўжае разглядаць справу начальніка вайскова-медыцынскай управы Мінабароны Аляксея Яськова. Сёння ён выступіў на пасяджэнні з апошнім словам, піша tut.by.

25 сакавіка падтрымаць Аляксея Яськова ў суд прыйшло блізу 30 чалавек - жонка, сябры, родныя і калегі па службе. Начальнік вайскова-медыцынскай управы Мінабароны Аляксей Яськоў выступіў у судзе з апошнім словам.

Паводле версіі следства, нагадаем, ён атрымаў 18 тысяч даляраў у якасці хабару ад пастаўшчыка медабсталявання. Пракурор просіць прысудзіць яго 9 гадоў пазбаўлення волі. Абвінавачаны віну не прызнае і намагае, што на яго ўзвёў паклёп сведка-бізнэсовец і што ў КДБ проста спрабуюць знайсці «стрэлачніка».

44-гадовага начальніка вайскова-медыцынскай управы Мінабароны Яськова Аляксея затрымалі ў чэрвені 2018 года. Паводле версіі следства, за паспяховую ўгоду ў пастаўцы эндаскапічнага абсталявання ён атрымліваў ад кампаній 7% ад агульнай сумы, за ультрагукавое абсталяванне - 5%. Грошы перадаў дырэктар фірмы «Геол-М» Семянюк, у дачыненні да якога таксама распачатая крымінальная справа - за ўхіленне ад выплаты падаткаў.

Амаль паўгадзіны лекар зачытваў сваё апошняе слова, было відаць, што ён хвалюецца.

— Усё маё жыццё было непарыўна звязанае з войскам, пачынаючы з Сувораўскай вучэльні ў Ленінградзе, заканчваючы пасадай начальніка вайскова-медыцынскай управы Мінабароны (прызначаны ў 40 гадоў. — Заўвага.). На якой бы пасадзе я ні быў, заўсёды выконваў свае абавязкі адказна і самааддана. Стараўся прыносіць карысць Узброеным сілам, сваёй краіне і народу.

Абвінавачаны звярнуў увагу, што за сваю працу быў двойчы ўдастоены дзяржаўных узнагарод. У 40 гадоў ён дасягнуў піка кар'еры для вайсковага лекара - атрымаў пасаду начальніка.

- Мяркую, што жыццё сваё пражыў нездарма. Выратаваў шмат жыццяў. Няўжо заява аднаго хлуслівага чалавека (маецца на ўвазе ключавы сведка Семянюк, які заявіў, што даваў хабар Яськову. — Заўвага), гатовага на ўсё, каб развязаць свае праблемы з законам, можа пусціць пад адхон жыццё сумленнага афіцэра?

Аляксей Яськоў распавёў, што за час знаходжання ў СІЗА КДБ следчы неаднаразова прапаноўваў яму супрацоўніцтва: даць паказанні супраць сябе і іншых абвінавачаных, прапаноўваў прызнаць, што даваў і перадаваў хабар службовым асобам.

- Я ніколі не думаў, што супрацоўніцтва - гэта агаворваць сябе ці іншых людзей. Хоць следчы пераконваў, што мяне за гэта могуць вызваліць. Але я не павінен і не хачу адказваць за тое, чаго не рабіў.

Абвінавачаны ўтрымліваецца ў СІЗА КДБ з чэрвеня 2018 года. З ягоных слоў, шэсць месяцаў яго наогул не дапытвалі. Першае і адзінае спатканне з жонкай ён атрымаў толькі праз восем месяцаў утрымання пад вартай. Сустрэцца з сынам, які вучыцца ў Расеі на вайсковага лекара, яму так і не дазволілі. Таксама некаторы час Яськоў, з ягоных слоў, не атрымліваў лістоў ад бацькі, пакуль той не звярнуўся са скаргай у КДБ. Першая сустрэча з адвакатам, дзе абвінавачаны мог у давернай абстаноўцы абмеркаваць дэталі справы, адбылася праз два месяцы пасля арышту. Аляксей Яськоў мяркуе, што канфідэнцыяльнасць была парушаная, бо пасля той сустрэчы Семянюк памяняў свае паказанні.

- Цяжка апісаць словамі пачуцці і думкі чалавека, які кожны дзень і кожную ноч усведамляе сваё бяспраўе. Я быў пазбаўлены інфармацыі аб тым, што адбываецца за межамі СІЗА. Кожны дзень чакаў вестачкі ад родных. Самае сумнае, што я ніяк не мог паўплываць на сітуацыю і яе змяніць.

У апошнім слове абвінавачаны падрабязна спыніўся на паказаннях ключавога сведкі Семенюка:

— Парадаксальная сітуацыя: чалавек, які абгаварыў мяне, які завышанымі коштамі пастаўляў абсталяванне ў Беларусь і ўхіляўся ад выплаты падаткаў, паводле аднаго артыкула вызвалены ад адказнасці, а паводле другога чакае памілавання, бо кампенсаваў шкоду. Дзякуючы яго плённай дзейнасці бюджэт не атрымаў ад 3 да 4 млн даляраў. А ягоныя даходы за кошт завышэння коштаў на абсталяванне - яшчэ вышэйшыя. І гэты чалавек нават не паўстане перад судом. А я, які спрабаваў гэтаму супрацьстаяць, знаходжуся ў СІЗА КДБ.

На думку Яськова, у Семенюка былі матывы яго агаворваць, каб, па-першае, выгарадзіць сваіх сапраўдных памагатых і ўтаіць сапраўдныя маштабы карупцыі з 2000 да 2019 года. Па-другое, «прадоўжыць працаваць паводле злачыннай схемы». Па-трэцяе, утаіць ад свайго партнёра Ладуцькі, які даваў грошы на хабары, што напраўду да адрасатаў гэтыя сумы не дайшлі, а асядалі ў кішэні Семенюка.

Чаму злачынная схема праіснавала амаль 20 гадоў? Прычыну, на думку Яськова, варта шукаць у неэфектыўнай працы Міністэрства антыманапольнага рэгулявання, Міністэрства аховы здароўя, праваахоўных і кантрольных органаў.

У 2017 і 2018 годзе, са слоў Аляксея Яськова, у яго неаднаразова былі канфлікты з Семянюком праз няякаснае пастаўленае абсталяванне і завышаныя кошты.

- З 2015 года я знаходзіўся ў аператыўнай распрацоўцы. Вайсковая контрвыведка вядзе галосны і негалосны кантроль за ўсімі вайскоўцамі, асабліва кіраўнікамі, правяраюць усе буйныя пастаўкі. Пераважная колькасць пастаўшчыкоў (медыкаментаў і медабсталявання. — Заўвага.) прайшлі праз калідоры КДБ, многія з іх дагэтуль у СІЗА. Ніхто з іх не сказаў, што даваў мне хабары, ніхто не ўзяў грэх на душу, акрамя Семенюка. Дастаткова знайсці аднаго, хто дзеля выратавання сваёй шкуры гатовы агаварыць чалавека. Страшна працаваць на кіроўных пасадах, бо на маім месцы можа апынуцца кожны кіраўнік. У іх разуменні (праваахоўнікі. — Заўвага.) паняцця «невінаватых няма» і «мы не памыляемся», але мы памятаем, чым скончылася прытрымліванне такім метадам для нашай краіны і народа.

Яськоў да апошняга спадзяваўся, што паводле ягонай справы разбяруцца і прызнаюць, што ён невінаваты. Але пазіцыя дзяржабвінаваўцы падчас спрэчак, з ягоных слоў, яго расчаравала. Пракурор, нагадаем, заявіў, што віна Аляксея Яськова даведзеная паводле ўсіх эпізодаў.

- Рана ці позна я давяду, што невінаваты (...) Высокі суд, я прашу аднавіць маё сумленнае імя, законнасць і справядлівасць.

Прысуд паводле справы будзе абвешчаны 3 красавіка.

Нагадаем, віну фігурант не прызнаў. Адзін са сведкаў, загадчык эндаскапічнага аддзялення 432-га клінічнага цэнтра (вайсковы шпіталь) Ігар Рэуцкі, распавядаў, што ніякіх указанняў аб закупцы абсталявання ад Яськова не атрымліваў, заданне рыхтавалася не пад канкрэтную фірму, цэнтр хацеў закупляць Японскае сучаснае абсталяванне Olympus, Pentax, Fujinon.

- За 29 гадоў службы былі розныя людзі: недалёкія і жорсткія. Аляксей Станіслававіч - прафесіянал, інтэлігентны чалавек, - так ахарактарызаваў абвінавачанага сведка Рэуцкі.