У ЗША ўхвалілі законапраект аб супрацьдзеянні «Паўночнаму струменю-2»
1- 26.03.2019, 16:03
- 9,484
Палата прадстаўнікоў ЗША прыняла акт аб энэргетычнай бяспецы Еўропы ад Расеі.
Ніжняя палата кангрэса ЗША прыняла законапраект, накіраваны на барацьбу з энэргетычным уплывам Расеі на Еўропу. За законапраект прагаласаваў 391 кангрэсмен, сведчаць вынікі галасавання, апублікаваныя на сайце Кангрэсу, піша liga.net.
Законапраект дазволіць Дзярждэпартаменту ЗША выдаткаваць у 2021 фінансавым годзе $580 млн на памяншэнне расейскага энэргетычнага ўплыву на краіны Еўропы і стымуляванне альтэрнатыўных інвестыцый, сцвярджае Bloomberg.
Акрамя таго, ён накіраваны супраць будаўніцтва расейскага газаправода «Паўночны струмень-2», у якім ЗША бачаць пагрозу энэргетычнай залежнасці Еўропы, адзначае «Голас Амерыкі».
«Расея на чале з Уладзімірам Пуціным ужо даўно выкарыстоўвае энэрганосьбіты ў якасці зброі для прымусу і маніпулявання еўрапейскімі краінамі», - сказаў пасля галасавання аўтар законапраекта Адам Кінзінгер.
«Паколькі вытворчасць энэргіі ў ЗША расце, у нас ёсць выдатная магчымасць падтрымаць нашых хаўруснікаў і даць альтэрнатыву пазіцыям, на якіх замацавалася Расея, у тым, што тычыцца крыніц энэргіі», - дадаў ён.
Дакумент яшчэ павінны прыняць у Сенаце ЗША, затым - падпісаць прэзідэнт ЗША Дональд Трамп.