Навукоўцы раяць есці не больш двух-трох яек на тыдзень

У даследаванні ўзялі ўдзел 30 тысяч чалавек

Многія гады даследнікі спрачаюцца з нагоды карысці і шкоды ўжывання ў ежу яек для здароўя чалавека. Меркаванні дыетолагаў з нагоды таго, колькі ж яек трэба або можна есці ў тыдзень, часцяком моцна адрозніваюцца. Згодна з вынікамі новага даследавання амерыканскіх навукоўцаў, апублікаваных у медыцынскім часопісе JAMA, два-тры яйкі ў тыдзень - аптымальны для здароўя варыянт, піша BBC. Калі есці яйкі часцей, гэта можа прывесці да павышэння ўзроўню халестэрыну ў крыві, што пагражае праблемамі ў працы сардэчна-сасудзістай сістэмы, сцвярджаюць навукоўцы.

У даследаванні амерыканскіх навукоўцаў узялі ўдзел 30 тысяч чалавек, звесткі збіраліся на працягу 17 гадоў.

Небяспека празмернага спажывання яек для здароўя звязана з высокім утрыманнем халестэрыну ў яечным жаўтку. У сярэднім у жаўтку вялікага яйка змяшчаецца прыблізна 185 міліграмаў халестэрыну.

Амерыканскія навукоўцы прыйшлі да высновы, што ўжыванне 300 міліграмаў халестэрыну ў дзень павялічвае рызыку ўзнікнення сардэчна-сасудзiстых захворванняў на 17%, а заўчаснай смерці - на 18%.

Ужыванне 3-4 яек на тыдзень, паводле даследавання, павышае рызыку ўзнікнення сардэчна-сасудзiстых захворванняў на 6%, а рызыку заўчаснай смерці - на 8%.

Калі есці па два яйкі ў дзень, то, як сцвярджаюць навукоўцы, рызыка развіцця сардэчна-сасудзiстых захворванняў узрастае адразу на 27%, а рызыка заўчаснай смерці - на 34%.

У гэтым даследаванні не ўлічваўся ўзрост удзельнікаў, узровень іх фізічнай актыўнасці, а таксама наяўнасць або адсутнасць такой шкоднай звычкі, як курэнне. Таксама навукоўцаў не цікавіла пытанне наяўнасці высокага артэрыяльнага ціску ва ўдзельнікаў даследавання.

Як падкрэсліваюць даследчыкі, незалежна ад таго, наколькі здаровым з'яўляецца ваша сэрца, чым больш яек вы з'ядаеце, тым больш рызыкуеце зарабіць захворванне сардэчна-сасудзістай сістэмы, у тым ліку ішэмічную хваробу сэрца або сардэчны прыступ.

«Наша даследаванне паказала, што калі два чалавекі сілкуюцца аднолькава, але з'ядаюць розную колькасць яек, то ў таго, хто з'ядае больш яек, рызыка зарабіць хваробу сэрца вышэйшая, чым у таго, хто з'ядае менш гэтага прадукту», - кажа суаўтар даследавання Нарына Ален.

Ці ёсць супярэчнасці?

Гэтыя высновы навукоўцаў супярэчаць звесткам папярэдніх даследаванняў, у якіх сцвярджалася, што ўжыванне яек не падвышае рызыку ўзнікнення сардэчна-сасудзiстых захворванняў, ішэмічнай хваробы сэрца або сардэчнага прыступу.

Але, як паказвае Нарына Ален, папярэднія даследаванні, як правіла, праводзіліся на працягу больш кароткага перыяду часу і не ўлічвалі шэраг важных фактараў.

Тым не менш даследчыкі не выключаюць, што і ў іх працы могуць быць памылкі.

Звесткі аб ўжыванні ў ежу яек збіраліся з дапамогай апытання ўдзельнікаў даследавання, ў якіх пыталі, як яны харчаваліся ў пэўны перыяд часу. Таму звесткі, якімі аперавалі даследчыкі, заснаваныя на тым, што памятаюць удзельнікі даследавання аб сваім харчаванні.

Гэта даследаванне з'яўляецца аглядным. Гэта значыць навукоўцы могуць выказаць здагадку, што ўжыванне вялікай колькасці яек з'яўляецца адной з прычын ўзнікнення хвароб сардэчна-сасудзістай сістэмы. Але яны не могуць адназначна ўсталёўваць прычынна-выніковую сувязь.

Дык колькі яек можна есці?

Нарына Ален раіць спыніцца на 2-3 яйках на тыдзень. Яна таксама рэкамендуе тым, хто не можа з якіх-небудзь прычын выконваць парады навукоўцаў, аддаваць перавагу бялку і з'ядаць менш жаўтка, дзе ў асноўным і ўтрымліваецца халестэрын.

Большасць дыетолагаў згодныя з тым, што трэба абмяжоўваць сябе ва ўжыванні не толькі яек, але і іншых прадуктаў з высокім утрыманнем халестэрыну.

Зрэшты, летась у часопісе Heart былі апублікаваныя вынікі даследавання брытанскіх навукоўцаў, якія прыйшлі да высновы, што ўжыванне ў ежу хоць бы аднаго яйка ў дзень зніжае рызыку сардэчна-сасудзiстых захворванняў. І тлумачаць гэта тым, што яйкі - адзін з самых насычаных па ўтрыманні карысных рэчываў прадукт харчавання. У яйках утрымліваецца шмат бялку, вітаміны A, D, B і B12, а таксама лютэін і зеаксантын, якія спрыяюць умацаванню зроку.

«З'ядаць адно або нават два яйкі ў дзень - гэта выдатна. Не трэба іх баяцца», - мяркуе доктар Фрэнкі Філіпс з Брытанскай дыеталагічнай асацыяцыі.

Ён, праўда, папярэджвае: яйкамі не варта злоўжываць, як і любой іншае ежай. У іх шмат бялку, а лішак бялку ў арганізме стварае залішнюю нагрузку на ныркі.