Хакеры з Ірана атакавалі 200 кампаній ва ўсім свеце
- 7.03.2019, 10:59
- 6,292
Шкода вылічаецца сотнямі мільёнаў даляраў.
Больш за 200 кампаній ва ўсім свеце зазналі за мінулыя два гады напады групы хакераў, як мяркуецца звязанай з урадам Ірана. Гэта вынікае з даследавання карпарацыі Microsoft, паведамляе dw.com.
Ахвярамі злачынцаў сталі большай часткай нафтагазавыя кампаніі, машынабудаўнічыя прадпрыемствы, а таксама канцэрны, якія займаюцца міжнародным бізнэсам, у такіх краінах, як Нямеччына, Сірыя, Вялікая Брытанія, Індыя і ЗША.
Хакерскія групоўкі Holmium і APT33
Паводле звестак карпарацыі Microsoft, сумарная шкода ад дзеянняў хакераў дасягнула сотняў мільёнаў даляраў.
Паводле ацэнкі спецыялістаў карпарацыі, за нападамі стаіць хакерская групоўка Holmium, якая мае сувязі з урадам Ірана. Акрамя таго, асобныя ўзломы выконвала на даручэнне Holmium іншая хакерская групоўка - APT33, сцвярджаецца ў даследаванні.
На думку некаторых экспэртаў у бяспецы, Тэгеран цяпер імкнецца нарасціць патэнцыял для кібератакі праз узмацненне санкцыйнага ціску на Іран з боку ЗША.