Сілавікі ўзялі ў абарот кіраўніка найбуйнейшага фармацэўтычнага дзяржаўнага холдынгу

Працягваецца зачыстка топ-мэнэджараў фармацэўтычнай галіны.

Нядаўна ў іх поле зроку трапіў генеральны дырэктар «кіроўнай кампаніі холдынгу «Белфармпрам» Валер Шаўчук, піша tut.by.

Са звестак, яго затрымалі на мінулым тыдні. У чым падазраюць Шаўчука, пакуль дакладна невядома. «Яго агаварылі», - упэўненая крыніца, знаёмая з гендырэктарам «Белфармпрама». Са слоў суразмоўцы, ужо больш за тыдзень ад асобы холдынгу ў перамовах удзельнічаюць намеснікі Шаўчука.

У мінулы чацвер у Міністэрстве антыманапольнага рэгулявання і гандлю адбыўся круглы стол «Агульны рынак лекавых сродкаў. Рэферэнтнае коштаўтварэнне». Ад «Белфармпрама» браў удзел намеснік гендырэктара холдынгу Віктар Шэін. Ён паскардзіўся на складанасці з доступам беларускіх лекаў да расейскіх дзяржаўных закупак.

У прыёмнай гендырэктара «Белфармпрама» журналістаў перанакіравалі па каментары ў Міністэрства аховы здароўя, дзе цягам двух дзён не ўдалося атрымаць інфармацыю. У КДБ Беларусі адмовіліся ад каментароў.

Улетку 2017 года Лукашэнка падпісаў указ аб ліквідацыі Дэпартамента фармацэўтычнай прамысловасці Міністэрства аховы здароўя. Неўзабаве замест яго быў створаны холдынг «Белфармпрам». Аснову новага прадпрыемства склалі супрацоўнікі ліквідаванага дэпартаменту. У гаспадарчае вядзенне «Белфармпраму» перадалі дзяржпакеты акцый найбуйнейшых фармпрадпрыемстваў краіны. Перад новым холдынгам паставілі задачу па павелічэнні дзелі беларускіх лекаў на ўнутраным рынку да 55%. А да 2022 года трэба палову прэпаратаў, якія вырабляюцца ў Беларусі, пастаўляць на экспарт, казаў нядаўна ў інтэрв'ю «Медыцынскаму весніку» Валер Шаўчук.

Са звестак на канец 2018 года, 38 беларускіх кампаній мелі ліцэнзіі на вытворчасць лекавых сродкаў. Усе яны аб'яднаныя ў рамках дзяржаўнага холдынгу. Ёсць таксама шэраг асацыяваных чальцоў холдынгу. «Белфармпрам» меў намер наладзіць шчыльныя кантакты і з прыватнымі ўладальнікамі аптэк і пастаўшчыкамі лекаў.

Варта адзначыць, што амаль год таму ў распрацоўку сілавікоў трапіў «кіраўнік найбуйнейшага дзяржаўнага фармацэўтычнага завода сталіцы». Прэс-служба ГУУС Менгарвыканкама прысвяціла гэтаму два прэс-рэлізы. Спачатку міліцыі падалася падазронай схема водпуску супрацьгрыпознай вакцыны праз адну прыватную структуру. Акрамя таго, з'яўляючыся дырэктарам іншага дзяржаўнага фармзаводу, фігурант арганізаваў закупку тавараў у замежнай кампаніі для далейшага вырабу медыцынскіх прэпаратаў для крыві і яе кампанентаў. Пры гэтым менавіта кіраўнік не палічыў неабходным выканаць абавязковыя пры закупцы працэдуры, прадугледжаныя дзейным заканадаўствам. Былі распачатыя крымінальныя справы паводле ч. 3 арт. 424 КК Беларусі (Злоўжыванне ўладай або службовымі паўнамоцтвамі) і паводле арт. 428 (Службовая халатнасць).

Як высветлілі журналісты, гаворка ідзе пра былога гендырэктару «Белмедпрэпаратаў» Паўла Кахаўца. Раней ён кіраваў Нясвіжскім заводам медпрэпаратаў. Гендырэктар найбуйнейшага дзяржаўнага фармацэўтычнага завода змяніўся ў канцы мінулага года.