NASA запланавала першы ў гісторыі выхад у адкрыты космас з удзелам толькі жанчын
3- 7.03.2019, 19:21
- 10,103
Астранаўты Эн Маклейн і Крысціна Кох 29 сакавіка будуць сем гадзін працаваць за межамі МКС.
Нацыянальнае аэракасмічнае агенцтва ЗША (NASA) рыхтуе першы ў гісторыі выхад у адкрыты космас пары астранаўтаў-жанчын. Пра гэта спікер агенцтва Стэфані Шырхольц 6 сакавіка паведаміла тэлеканалу CNN.
Унікальны выхад з удзелам астранаўтаў Эн Маклейн і Крысціны Кох адбудзецца 29 сакавіка, яго чаканая працягласць - сем гадзін. Ён не планаваўся загадзя, бо заданні, якія трэба выканаць жанчынам, былі намечаны яшчэ на восень 2018 года, сказала Шырхольц.
Вядучым дыспетчарам гэтага выхаду ў космас у цэнтры кіравання ў Х'юстане таксама будзе жанчына, Джэкі Кейдж, дадалі ў NASA.
За тыдзень да выхаду з Кох Маклейн пабывае за межамі МКС разам з Нікам Хейгам, паведамляе gordonua.com.
Маклейн знаходзіцца на МКС з 3 снежня 2018 года, яна ўдзельніца 58-й экспедыцыі. Кох павінна адправіцца на арбіту 14 сакавіка на караблі «Саюз МС-12» у складзе аб'яднанай экспедыцыі №59/60, разам з Хейгам і Аляксеем Аўчыніным.
Кох і Маклейн далучыліся да атрада астранаўтаў у 2013 годзе. Для абедзвюх гэта першы палёт на МКС.
Прычынай змены графіка экспедыцый і даследаванняў на касмічнай станцыі стала аварыя касмічнага карабля «Саюз МС-10», запушчанага 11 кастрычніка 2018 году з касмадрома Байканур. Карабель не выйшаў на арбіту праз аварыю носьбіта. У складзе экіпажа былі касманаўт «Раскосмаса» Аўчынін і астранаўт NASA Хейг, пры аварыйным спуску яны не пацярпелі.