Услед за яблыкамі Расея можа забараніць увоз з Беларусі трускалак і шампіньёнаў
13- 10.04.2019, 17:04
- 13,053
Рассельгаснагляд разглядае ўсе тыпы нехарактэрнай для Беларусі прадукцыі.
Рассельгаснагляд не выключае ўвядзення забароны на ўвоз трускалак, шампіньёнаў і пекінскай капусты з Беларусі ў Расею. Пра гэта ТАСС паведаміў кіраўнік установы Сяргей Данкверт.
«Мы далей разглядаем іншыя тыпы прадукцыі, нехарактэрныя для Беларусі. Мы вымушаныя такія захады ўжываць. І далей разглядаем трускалкі, пекінскую капусту, шампіньёны», - сказаў ён.
Данкверт адзначыў, што пастановай Еўразійскай камісіі Рассельгаснагляду было забаронена весці рэестр прадпрыемстваў-вытворцаў плодаагародніннай прадукцыі з улікам вырабленых імі аб'ёмаў, у выніку чаго расейская структура не валодае інфармацыяй аб рэальна вырабленай прадукцыі. Са слоў кіраўніка ўстановы, падчас праверкі Рассельгаснаглядам было ўстаноўлена, што аб'ём рэальна пастаўленых з Беларусі ў Расею шампіньёнаў удвая перавышае афіцыйна зарэгістраваны аб'ём гэтай прадукцыі для паставак у нашу краіну.
«Мы будзем далей распаўсюджваць гэтыя абмежаванні, бо гэта прадукцыя невядомага фітасанітарнага статусу», - падкрэсліў ён.
Данкверт таксама паведаміў аб тым, што на 15 красавіка намечаная сустрэча міністраў сельскай гаспадаркі Расеі і Беларусі. «Я думаю, што мы скарыстаемся гэтым выпадкам, каб гэтае пытанне абмеркаваць», - сказаў на заканчэнне ён.
Раней сёння Рассельгаснагляд паведаміў аб увядзенні з 12 красавіка абмежавання на пастаўкі ў РФ яблыкаў і груш з Беларусі.