У Беларусі ўпершыню ў гісторыі з'явіўся амбасадар КНДР
15- 11.04.2019, 19:21
- 11,819
Амбасада Паўночнай Карэі адчынілася ў Беларусі ў 2016 годзе.
11 красавіка ў МЗС Беларусі прайшла сустрэча амбасадара КНДР Зу Зэн Бона з намеснікам міністра Андрэем Дапкюнасам з нагоды ягонага прыбыцця ў краіну. Пра гэта паведамляе прэс-служба МЗС Беларусі.
Адзначаецца, што Дапкюнас вітаў пастанову кіраўніцтва Карэйскай Народна-Дэмакратычнай Рэспублікі пра накіраванне ў Беларусь першага ў гісторыі двухбаковых стасункаў амбасадара КНДР з рэзідэнцыяй у Менску і пажадаў Зу Зэн Бону поспехаў на адказнай пасадзе.
У ходзе сустрэчы амбасадар перадаў копіі даверчых граматаў.
«У сяброўскай гутарцы бакі абмеркавалі становішча і перспектывы развіцця двухбаковых стасункаў, а таксама супрацоўніцтва ў міжнародных арганізацыях», – праінфармавалі ў МЗС.
Нагадаем, у 2016 годзе ў Беларусі адчынілася амбасада КНДР. Аднак у дыпмісіі на той момант працавалі афіцыйныя прадстаўнікі КНДР – часовы павераны ў справах Пак Ен Сік і гандлёвы прадстаўнік Лю Чол Хун.