«Дармаеды» пералічылі з-за мяжы ў Беларусь больш за мільярд даляраў

Людзі, якія трапілі пад дзеянне дэкрэта Лукашэнкі, стварылі 2,1% ВУП Беларусі.

Апошнім часам беларускія гастарбайтэры штогод пералічваюць дадому больш за мільярд даляраў. Працоўная міграцыя стала адным з асноўных спосабаў выжывання для жыхароў рэгіёнаў. Прычым усё больш прывабнай у плане працоўнай міграцыі становіцца Польшча, хоць раней часцей за ўсё ездзілі ў Расею, піша tut.by са спасылкай на naviny.by.

За 2018 год беларускія гастарбайтэры пералічылі дадому амаль 1,2 млрд даляраў, што складае 2,1% ВУП. Такую ацэнку дае Сусветны банк у свежым даследаванні аб грашовых пералічэннях мігрантаў.

У параўнанні з крызісным 2015 годам сума пералічэнняў павялічылася на 263 млн даляраў, але паменшылася на 59 млн даляраў у параўнанні з 2017 годам, калі беларускія мігранты пералічылі дадому рэкордныя 1,254 млрд даляраў.

У дачыненні да ВУП сума грашовых пералічэнняў у апошнія тры гады перавышае 2%. Пяць гадоў таму ён быў на ўзроўні 1,6%.

Ускосным пацвярджэннем росту пералічэнняў з-за мяжы з'яўляецца той факт, што ўжо тры гады запар беларусы з'яўляюцца чыстымі прадаўцамі наяўнай валюты.

Нагадаем, беларусы, якія працуюць і вучацца за мяжой, трапляюць пад дзеянне дэкрэта аб «дармаедах».