«Табакеркі» падступаюць да Менска

У Бараўлянах усталявалі тытунёвы шапік.

У пасёлку Бараўлянах, блізкім прыгарадзе сталіцы, на адным з прыпынкаў з'явіўся тытунёвы шапік. Раней СМІ паведамлялі, што ў Беларусі ўсталююць 2500 тытунёвых шапікаў, прычым 500 з іх - у Менску, хоць у 2008 годзе ў сталіцы правялі маштабную «зачыстку» і дэмантавалі ўсе камерцыйныя шапікі, каб пазбавіць горад ад неахайных рэліктаў перабудовы. За два гады Менск пазбавіўся прыкладна трох тысяч шапікаў. Аднак прайшло 10 гадоў, і шапікі зноў падабраліся да яго межаў, паведамляе onliner.by.

Шапік усталяваны пару дзён таму, аднак ён пакуль не функцыянуе.

Летась у Менску ўжо з'явіўся ларок «Табакерка», але тут жа знік. У кампаніі «Энэрга Оіл», уладальніцы сеткі тытунёвых кіёскаў, тады адмовіліся даваць каментары з нагоды таго, што здарылася: раз шапіка няма, то і абмяркоўваць няма чаго.

Адразу пасля гэтага «Табакеркі» пачалі ўсталёўваць за межамі сталіцы, нягледзячы на пратэсты беларусаў. Але ў рэгіёнах улады ніколі не змагаліся з камерцыйнымі ларкамі, а ў Менску ўсяго 10 гадоў таму ад аб'ектаў вулічнага гандлю засталіся толькі сціплыя шапікі з садавіной і газетамі. Ні незадаволенасць менчукоў, ні пратэсты прадпрымальнікаў не выратавалі тады шапікі ад «зачысткі». І эстэтыка - не адзіная прычына, з якой шапікі наважылі з Менска прыбраць. Са слоў чыноўнікаў, шапікі складалі канкурэнцыю «асноўным гандлёвым аб'ектам». А менчукі выставілі іншы аргумент: дзякуючы шапікам моладзь пачынае рана паліць і піць спіртное.