Дэгустацыя сухога пайка з Беларусі сабрала мільён праглядаў на YouTube

Амерыканскі відэаблогер спрабуе перад камерай на смак сухія пайкі войскаў розных краін свету.

Амерыканскі відэаблогер Steve1989 спрабуе перад камерай на смак сухія пайкі войскаў розных краін і выкладвае гэтыя відэа на сваім YouTube-канале.

Крыху больш за год таму, 9 студзеня 2018-га, ён апублікаваў 26-хвілінны ролік, у якім дэгустуе сутачны індывідуальны рацыён харчавання беларускага войска, паведамляе belmir.by.

Відэа за гэты час сабрала больш за 1,17 млн праглядаў. Акрамя таго, пад ім на гэты момант сабралася звыш 3,4 тысячы каментароў ад карыстальнікаў.

У складзе сухпайку ў якасці асноўнай стравы былі тры кансервы: каша грачаная з ялавічынай, пярловая каша з ялавічынай і кураня ў падліўцы.

Акрамя таго, туды ўвайшлі па дзве ўпакоўкі паштэту, перапечкі і кісель, а таксама вяндліна, канфіцюры, маленькая шакаладка, кава і цукар.

Да ўсяго гэтага яшчэ прыкладаліся партатыўны разагравальнік, запалкі, сталовыя прыборы і сурвэткі - як звычайныя, так і вільготныя.

У выніку дэгустатарам вельмі спадабаўся беларускі сухі паёк. Ён назваў яго «неверагодна добра зробленым», а пра кансервы, напрыклад, выказаўся, што яны «нібы прыгатаваныя дома».

Эмоцыі блогера перадаліся і шматлікім каментатарам. «Прама захацелася запісацца ў беларускае войска», - піша, да прыкладу, Rob G.