Аэрапорт «Менск» з 1 траўня змяняе правілы надгляду ручной паклажы

Нацыянальны аэрапорт уводзіць сістэму аўтаматычнага вяртання латкоў у пунктах надгляду.

Пра гэта авіякампанія «Белавія» паведаміла ў сацыяльных сетках.

Цяпер пры даглядзе ўсю ручную паклажу давядзецца змяшчаць у спецыяльна распрацаваныя латкі і, як і раней, адпраўляць на праверку ў інтраскоп. Дагляд рэчаў без латка будзе немагчымы. Калі багаж будзе перавышаць дапушчальныя памеры, рэчы будуць вяртацца на стойку рэгістрацыі для здачы багажу.

Максімальна дапушчальныя памеры ручной паклажы ў авіякампаніі «Белавія» - 55/40/20 см.

Паведамляецца, што запуск такой сістэмы дазволіць скараціць час на працэдуру дагляду і павялічыць прапускную здольнасць пункта.