У пасёлку пад Менскам тэхніка знішчае дарогі, пабудаваныя за кошт жыхароў

Жыхары Валер’янава абураныя.

Жыхары многіх катэджных пасёлкаў каля сталіцы пішуць лісты, барозняць кабінеты чыноўнікаў, абы не плаціць за ўласны лапік асфальту пад вокнамі, і ў выніку гадамі ездзяць па дашчэнту пабітаму дарожнаму палатну ў чаканні цуду. Жыхары Валер’янава пайшлі іншым шляхам: сем гадоў таму яны наважылі самі стаць кавалямі свайго шчасця і праклалі за свой кошт дарогі ўнутры пасёлка. Але неўзабаве непадалёк пачалі будаваць гандлёвы цэнтр, праз Валер’янава пусцілі караваны самазвалаў, і асфальт, за які нехта аддаў $1500, хтосьці $3000, а нехта значна больш, ператварыўся ў хлам, піша onliner.by.

- Ужо шмат гадоў уздоўж лагойскай трасы вядзецца зацяжное будаўніцтва гандлёвага комплексу, - распавядае Зміцер, жыхар Валяр'янава, які заплаціў $3000 за кавалак асфальту перад сваім домам. - Спачатку зямля належала расейцам, будоўля не заладзілася, і праз чатыры гады пляцоўку забралі разам з недабудаваным аб'ектам.

Будоўля, якая прымыкае да Валяр'янава, размяшчаецца ўздоўж шашы і жылой вуліцы, і ўсе пад'езды ідуць праз наш пасёлак. У нас няма ходнікаў, у цёмны час дня пасёлак практычна не асвятляецца, бо сельсавет эканоміць на электрычнасці. Можаце сабе ўявіць: дзеці на роварах, самакатах, жанчыны з вазкамі, а сярод іх курсуюць чатырохвосевыя самазвалы з бетонамяшалкі.

І мала таго, што проста курсуюць. Яны ператварылі нашы дарогі ў хлам. А мы асфальтавалі гэтыя дарогі за свае грошы. Гаспадар кожнага дома, які стаяў на нашай вуліцы, сем гадоў таму заплаціў $1500 за кавалак асфальту перад сваім катэджам. Асабіста я заплаціў $3000, бо ў мяне кутняя пляцоўка - цяпер яго разрэзалі балгаркай. І наогул, дарога, пабудаваная за наш кошт, ператвараецца ў руіны. І нам жа даводзіцца за свой кошт яе латаць.

Пакуль дарогі руйнаваў першы забудоўшчык, мы дайшлі да дзяржкантролю Менскай вобласці. І дзяржкантроль абавязаў гэтага забудоўшчыка напісаць гарантыйны ліст, што ён адновіць дарожнае пакрыццё пасля здачы гандлёвага аб'екта. Але з тых часоў забудоўшчыка няма, і больш ён нікому нічога не вінен.

Прыйшоў новы забудоўшчык - УП «Агракамбінат Ждановічы», які таксама нікому нічога не вінен. Ён прадоўжыў будаваць гандлёвы цэнтр, паміж справай знішчаючы нашы дарогі. Дайшло да таго, што на мінулым тыдні яны разрэзалі балгаркай асфальт, каб правесці сабе інтэрнэт. Прараб кажа: «Адновім» - але вы ўяўляеце, што гэта будзе за аднаўленне? Як і цяпер, ямкавы рамонт: прыехалі, закідалі асфальтам пару калдобін, а астатнія стаяць адкрытыя з аранжавымі конусамі пасярод дарогі.

А Цэнтральная вуліца, якой жыхары паміж МАЗамі ідуць на прыпынак транспарту, - ад яе наогул амаль нічога не засталося. Гэтую вуліцу пракладалі два домаўладальнікі за супольны рахунак у якасці бартэру з сельсаветам за выдадзеныя надзелы.

Каментар начальніка ўчастка

- Я дапускаю, што гэтыя дарогі ў свой час, не дачакаўшыся з бюджэту нейкіх грошай, праклалі жыхары за свой кошт - напэўна, яны могуць сабе гэта дазволіць, - каментуе сітуацыю Антон Камчыцкі, начальнік участка будаўніцтва гандлёвага комплексу з адміністрацыйнымі, офіснымі і складскімі памяшканнямі ў вёсцы Валяр'янаве. - Але цяпер гэтыя дарогі нічым не адрозніваюцца ад усякай іншай дарогі ў межах горада ці вёскі. Яны нанесеныя на мапу і перададзеныя ў вядзенне гарадскіх альбо раённых службаў, якія проста цяпер - я ехаў і бачыў - робяць там рамонт. Па заканчэнні будаўніцтва на зварот грамадзян, хутчэй за ўсё, адміністрацыя іх яшчэ раз абновіць. А тэхніка ездзіць праз Валер’янава, бо гэта адзіны заезд і ён узгоднены з усімі патрэбнымі інстанцыямі.