Відэафакт: Украінскіх маракоў у лефортаўскім судзе Масквы сустрэлі гучнымі воплескамі

Захопленым РФ каля Керчанскай пратокі ўкраінцам зладзілі авацыю.

Сёння ў лефортаўскім судзе Масквы праходзяць слуханні аб прадаўжэнні меры стрымання для ўкраінскіх маракоў, захопленых РФ каля Керчанскай пратокі. Упаўнаважаная Вярхоўнай Рады ў правах чалавека Людміла Дзянісава, якая прыбыла ў Маскву для ўдзелу ў пасяджэннях, на сваёй старонцы ў Facebook апублікавала відэа, як украінскіх маракоў сустракаюць прыбылыя ў суд сваякі, актывісты і журналісты, паведамляе gordonua.com.

«Здолела ўбачыць нашых ваеннапалонных перад пачаткам судовага паседжання ў лефортаўскім судзе Масквы», - так падпісала яна запіс. Ваеннапалонных сустрэлі гучнымі воплескамі.

25 лістапада 2018 года РФ абстраляла і захапіла ў Чорным моры катэры ўкраінскіх Вайскова-марскіх сіл «Бярдзянск» і «Нікапаль», а таксама буксір «Яны Капу», якія вярталіся ў Адэсу пасля спробы прайсці праз Керчанскую пратоку ў Азоўскае мора.

Расейскія сілавікі затрымалі 24 украінскіх маракоў, пазней іх арыштавалі ў крымскіх «судах» і перавезлі ў Маскву. Траіх параненых украінцаў змясцілі ў лякарню следчага ізалятара «Матроская цішыня», астатніх даставілі ў СІЗА «Лефортава». Цяпер усе маракі знаходзяцца ў «Лефортаве».

Усім украінцам выставілі абвінавачванні ў незаконным перасячэнні мяжы РФ. Украіна ўважае маракоў за ваеннапалонных і патрабуе адпусціць іх. Ва ўправе вярхоўнага камісара ААН правоў чалавека заявілі, што ўкраінскія маракі як палонныя павінны знаходзіцца пад абаронай Жэнеўскай канвенцыі.

15 красавіка адвакат Мікалай Полазаў паведаміў, што тэрмін папярэдняга расследавання ў дачыненні да палонных прадоўжаны на тры месяцы.