У Інданэзіі абодва кандыдаты ў прэзідэнты заяўляюць пра перамогу на выбарах
- 18.04.2019, 11:25
- 5,925
Апытанні сведчаць аб пераабранні на другі тэрмін ранейшага кіраўніка дзяржавы.
У Інданэзіі прэзідэнт Джок Відода з вялікай імавернасцю застанецца на чале дзяржавы на новы пяцігадовы тэрмін. Паводле прагнозаў, 57-гадовы Відода ў выніку выбараў у самой населенай мусульманскай краіне значна апярэдзіў свайго спаборніка-нацыяналіста - адстаўнога генерала Прабову Субіянту, набраўшы ад 54 да 55 адсоткаў галасоў. У падтрымку Субіянты выказаліся блізу 44 адсоткаў выбаршчыкаў, паведамілі інданэзійскія сацыялагічныя інстытуты ў сераду, 17 красавіка, перадае dw.com.
У той жа час Субіянта пратэстуе супраць меркаваных парушэнняў на выбарах і абвяшчае пераможцам сябе. Афіцыйныя вынікі галасавання будуць абвешчаныя толькі ў траўні.
Прадстаўнік памяркоўнага ісламу
Інданэзія, якая складаецца з 17 з лішкам тысяч выспаў - трэцяя памерам дэмакратыя ў свеце. Амаль 90% 260-мільённага насельніцтва Інданэзіі - мусульмане.
Відода лічыцца прадстаўніком памяркоўнага ісламу. Яго неаднаразова крытыкавалі за таго, што ён недастаткова прасоўвае іслам. У выніку Відода вылучыў кандыдатам на пасаду віцэ-прэзідэнта вядомага святара Маруфа Аміна.
Доўгі час Інданэзія ўважалася за мадэль талерантнага ісламу. Аднак за апошнія гады кансэрватыўныя сілы ўзмацнілі ўплыў і ў гэтай краіне. Былы губернатар Джакарты - паплечнік Відоды - патрапіў у турму за абразу Карана.