Да блогера і актывіста Алесю Круткіна прыйшла міліцыя
2- 18.04.2019, 13:55
- 25,385
Ад яго некалькі дзён няма ніякіх звестак.
На сувязь з сябрамі Алесь Круткін не выходзіць, на паведамленні не адказвае. Магчыма, Круткіна затрымалі супрацоўнікі міліцыі, паведамляе «Вясна».
Апошняе паведамленне, якім ён падзяліўся на сваёй старонцы ў «Фэйсбуку» - лаканічнае: «Да мяне прыйшла міліцыя».
А вось на старонцы Круткіна «Вконтакте» інфармацыі больш:
«Учора ўвечары, 15.04 да маіх бацькоў у аграгарадок Захарнічы (Полацкі раён) прыехалі 8 (!) супрацоўнікаў міліцыі і КДБ. Шукалі мяне. Аблазілі дом, усе памяшканні, склеп, нават хлеў і іншыя прысядзібныя пабудовы. Я на той момант ужо быў у Менску, каб мірна выказаць сваю нязгоду наконт руйнавання месца сталінскіх рэпрэсій у Курапатах і падтрымаць беларускіх палітвязняў. Ля адміністрацыі псеўдапрэзідэнта Беларусі.
Сёння раніцай мяне каля дома таксама чакала міліцыя. Мабыць, мяне хочуць затрымаць за прызыў у СМІ прыйсці да адміністрацыі дыктатара на мірны малебен. Калі ўчора раптам мне дома што-небудзь падкінулі, то я заяўляю, што ні наркотыкаў, ні зброі ў мяне няма і не можа быць у прынцыпе. Ровары я таксама не краду».
Нядаўна Аляксандр Круткін аднавіў свой блог «Самакруткін» на Youtube-канале, дзе ўтрымліваюцца вострасацыяльныя ролікі.