Падатак на здабычу нафты і калійнай солі будзе брацца ў беларускіх рублях

Адпаведны ўказ падпісаў Лукашэнка.

Кіраўнік Беларусі Аляксандр Лукашэнка падпісаў указ N151, якім удасканальваюцца прававыя стасункі ў сферы падатковага заканадаўства, паведамілі interfax.by ў прэс-службе дыктатара.

«Для далейшай дэдаларызацыі эканомікі дакументам прадугледжваецца выплата падатку за здабычу (выемку) прыродных рэсурсаў у дачыненні да нафты і солі калійнай у беларускіх рублях, а не ў замежнай валюце», - адзначылі ў прэс-службе.

Акрамя таго, указам прадугледжаная паэтапнае скасаванне механізму абмежавання падатковых вылікаў падатку на дабаўленую вартасць пры імпарце тавараў. «Гэта дазволіць плацельшчыкам на больш раннім этапе прымаць да выліку падатак на дабаўленую вартасць і такім чынам папаўняць абаротныя сродкі», - падкрэслілі ў прэс-службе.

Таксама дакументам самазанятым грамадзянам надаецца права выконваць працы і аказваць паслугі не толькі для фізічных, але і для юрыдычных асоб і індывідуальных прадпрымальнікаў.