На мяжы Індыі ды Пакістана адбылася страляніна

Загінулі сем чалавек.

Ля мяжы Індыі і Пакістана ў Кашміры адбылася страляніна паміж вайскоўцамі абедзвюх краін.

Як паведамляе Associated Press, у выніку страляніны загінулі сем чалавек: з пакістанскай боку загінулі трое вайскоўцаў і адзін мірны жыхар, з індыйскага - адзін вайсковец і двое мірных жыхароў, адно з якіх - дзіця.

Акрамя таго, некалькі чалавек атрымалі раненні.

У заяве пакістанскага войска адзначаецца, што вайскоўцы «далі эфектыўны адказ» на дзеянні Індыі, якая, паводле версіі Пакістана, правяла абстрэл пазіцый пакістанскіх вайскоўцаў у Кашміры.

У сваю чаргу войска Індыі абвінаваціла Пакістан у тым, што пакістанскія вайскоўцы першымі адкрылі агонь, правёўшы напярэдадні мінамётны абстрэл уздоўж лініі кантролю ў Кашміры.

Напружанасць у дачыненнях паміж Індыяй і Пакістанам абвастрылася ў лютым пасля таго, як Індыя нанесла авіяўдар па цэлях на падкантрольнай Пакістану тэрыторыі Кашміра ў адказ на тэракт, у якім у пачатку лютага загінулі блізу 40 працаўнікоў службы бяспекі Індыі.

Пасля гэтага Пакістан заявіў, што збіў два самалёты ВПС Індыі над лініяй кантролю паміж краінамі ў сваёй паветранай прасторы.

У адказ ВПС Індыі збілі пакістанскі знішчальнік F-16, які парушыў паветраную прастору краіны.

Тэрыторыя Кашміра ўжо доўгія гады з'яўляецца прадметам спрэчкі паміж Індыяй і Пакістанам.

Атрымаўшы ў 1947 годзе незалежнасць, Брытанская Індыя падзялілася на дзве краіны паводле рэлігійнай прыкметы.

Да сённяшняга дня ў Кашміры не існуе дзяржаўнай мяжы, а Індыю і Пакістан у гэтым рэгіёне падзяляе так званая Лінія кантролю.

З 1989 года там актывізаваліся ісламісцкія баевікі, якіх, як сцвярджаюць у Індыі, падтрымлівае Пакістан.