Паўночная Македонія выбірае новага прэзідэнта сярод трох кандыдатаў

У Паўночнай Македоніі сёння праходзіць першы тур выбараў новага прэзідэнта краіны.

Пра гэта паведамляе "Еўрапейская праўда".

На пасаду прэтэндуюць усяго тры кандыдаты, мандат цяперашняга прэзідэнта Георге Іванова заканчваецца 12 траўня.

Кандыдатам ад кіроўчай кааліцыі з'яўляецца 55-гадовы Стэвен Пендароўскі, які ў сваёй кампаніі настойваў на інтэграцыі краіны ў NATO і Еўразвяз.

Апазіцыйная партыя VMRO-DPMNE вылучыла 64-гадовую Гордану Сіляноўску-Даўкову, якая выступіла супраць пагаднення з Грэцыяй аб перайменаванні краіны і падчас перадвыбарных выступленняў заяўляла, што зробіць усё, каб яе перагледзець.

Албанскія апазіцыйныя партыі падтрымалі 59-гадовага Блерыма Рэку, які заклікаў да роўнасці паміж грамадзянамі і неабходнасці паскарэння рэформаў.

Кандыдат можа перамагчы ўжо ў першым туры, калі атрымае 50% плюс адзін голас ад агульнага ліку зарэгістраваных выбарнікаў.

Другі тур выбараў, калі ён спатрэбіцца, запланаваны праз два тыдні, 5 траўня. Падчас другога тура выбараў яўка павінна перавышаць 40%, каб выбары былі прызнаныя сапраўднымі.