Фотафакт: Украінцы ў Варшаве стаяць у доўгай чарзе да ўрнаў

Украінцы сёння выбіраюць прэзідэнта.

З самай раніцы да амбасады Украіны ў Польшчы сабралася чарга з ахвочых прагаласаваць.

Выбарчыя ўчасткі ва Украіне адкрыліся а 8 гадзін раніцы і будуць працаваць да 20:00. За мяжой галасаванне праводзіцца паводле мясцовага часу. У Польшчы, у пасольстве Украіны ў Варшаве, а таксама ў консульствах у Гданьску, Кракаве і Любліне галасаванне пачалося згодна з планам - таксама а 8 раніцы і скончыцца а 20, паведамляе «Белсат».

Амбасада Украіны ў Варшаве апублікавала сёння раніцай фатаграфіі сотняў людзей, якія чакаюць у чарзе для галасавання.

Грамадзяне Украіны, якія пражываюць у Польшчы, у першым туры прэзідэнцкіх выбараў у асноўным галасавалі за канкурэнта цяперашняга кіраўніка дзяржавы - Уладзіміра Зяленскага.

Паводле апытанняў сярод тых, хто запэўнівае, што абавязкова возьме ўдзел у выбарах, за Зяленскага гатовыя прагаласаваць 73%. Пятро Парашэнка можа разлічваць на 27% падтрымкі.