Да восені вырашыцца, ці ўсталююць ЗША бязвізавы рэжым з Польшчай

Чым больш палякаў атрымаюць візы ў ЗША да восені, тым большая імавернасць таго, што ЗША увядуць бязвізавы рэжым для Польшчы.

Амерыканская амбасада ў Варшаве заклікае палякаў падаваць заяўкі на візы ў ЗША. Дыпламаты запэўніваюць, што чым больш людзей атрымаюць візы ў ЗША да восені, тым вышэйшая імавернасць таго, што Польшча далучыцца да бязвізавай праграмы для наведвання Амерыкі Visa Waiver, паведамляе «Радыё Польшча».

Пакуль што, паводле звестак за кастрычнік 2017 - верасень 2018 гады адсотак адмоў у атрыманні віз для палякаў складаў 4 працэнты.

Чым больш людзей будуць звяртацца за атрыманнем візы, тым большая верагоднасць таго, што ўзровень адмовы спадзе ніжэй 3 працэнтаў, што з'яўляецца парогам, які дазволіць Польшчы далучыцца да праграмы Visa Waiver.

Цяпер кошт стандартнай турыстычнай або дзелавой візы ў ЗША складае 624 злотыя.

Кампанію, накіраваную на тое, каб палякі падавалі заяўкі на атрыманне візы ў Злучаныя Штаты Амерыкі, з мінулага года праводзіць кааліцыя з шасці польскіх кампаній і ўстаноў, у тым ліку Польскія авіялініі Lot, фонд Teraz Polska і Інстытут думкі Шумана.