Спецдакладчык ААН: Рыхтуецца да запуску кампанія ў падтрымку прафзвязу РЭП
3- 25.04.2019, 10:24
- 8,186
Мішэль Форст вельмі высока ацаніў дзейнасць незалежнага прафзвязу ў Беларусі.
Спецыяльны дакладчык ААН аб становішчы праваабаронцаў Мішэль Форст падчас візіту ў Беларусь сустрэўся з лідарам незалежнага прафзвязу РЭП Генадзем Фядынічам.
Лідар РЭП распавёў praca-by.info як праходзіла сустрэча:
- Мішэль Форст узяў у мяне невялікае інтэрв'ю для кампаніі #TogetherWeDefend, якая створана для падтрымкі праваабаронцаў ва ўсім свеце. Ініцыяваў стварэнне гэтага праекта сам спецдакладчык. Ён распавёў, што бачыць сваю задачу ў першую чаргу ў дапамозе і садзейнічанні развіцця міжнароднай салідарнасці. Улічваючы неспрыяльныя ўмовы для праваабаронцаў у розных частках свету, менавіта кампаніі салідарнасці дазволяць адчуць сябе не самотнымі і ў чарговы раз звярнуць увагу сусветнай супольнасці на праблему рэпрэсій у дачыненні да тых, хто вядзе актыўную барацьбу за правы чалавека. Акрамя таго на сайце можна прачытаць гісторыі актывістаў з розных краін і напісаць ім ліст.
Спецдакладчык таксама шмат цікавіўся сітуацыяй вакол «справы прафзвязаў» і фактамі парушэння правоў незалежных прафзвязаў у Беларусі. Спадар Форст распавёў, што сачыў за навінамі пра ціск на РЭП. Ён падтрымлівае пазіцыю аб тым, што «справа прафзвязаў» асабліва палітызаваная і стала расправай за актыўныя дзеянні прафзвязу, у тым ліку супраць дэкрэта «аб дармаедах» у 2017 годзе.
Са слоў Мішэля Форста, неўзабаве на сайце TogetherWeDefend стартуе кампанія ў падтрымку РЭП.
- Мяне прыемна здзівіла, калі спадар Форст пасля нашага інтэрв'ю адзначыў, што ўпершыню сутыкаецца з такой актыўнай працай прафзвязаў на постсавецкай прасторы і ў краінах Еўропы. Гэта вельмі высокая ацэнка нашай дзейнасці. Сапраўды, колькасць зваротаў у РЭП расце з кожным месяцам і мы рады, што наша праца заўважае і міжнародная супольнасць.
Спецдакладчык пытаўся пра тое, як праходзіць адбыванне «хатняй хіміі». Ён мяркуе, што працэдура ўнясення ў спіс палітвязняў павінна быць перагледжаная. Згодна з устаноўленым крытэрам толькі праваабаронца альбо актывіст, які адбывае пакаранне ў месцах пазбаўлення волі паводле палітычна матываваных прысудаў уважаюцца за палітвязняў. Аднак, «хатняя хімія» таксама з'яўляецца мерай абмежавання волі. Тое, што ты не знаходзішся ў турме не значыць, што на цябе не ціснуць абмежаванні, кантроль сілавых структур, магчымасць у кожны момант накласці штраф і аформіць парушэнне адбыцця пакарання. Гэта ж таксама ціск!
Ён пагадзіўся, што праваабарончыя арганізацыі павінны пашырыць крытэрыі прызнання грамадзян палітвязнямі.
У рамках індывідуальнага чатырохдзённага візіту спецыяльны дакладчык ААН аб становішчы праваабаронцаў Мішэль Форст таксама сустрэўся з актывістамі праваабарончых арганізацый, прадстаўнікамі Міністэрства юстыцыі і Міністэрства замежных спраў Беларусі. Мандат спецдакладчыка заканчваецца летам 2020 года. Але, паводле ягоных слоў, ён не мае намеру спыняць абарону праваабаронцаў, бо ўважае гэта за галоўную справу свайго жыцця.