26 траўня 2019, Нядзеля, 9:37
За нашу і вашу свабоду!
Рубрыкі

Бацька двух тэрарыстаў са Шры-Ланкі выявіўся мільярдэрам

3
Фота: EPA

Бізнэсовец затрыманы.

Улады Шры-Ланкі абвясцілі аб затрыманні мясцовага мільярдэра Махамеда Ібрагіма, бацькі двух смяротнікаў, якія ўчынілі выбухі 21 красавіка. Пра гэта тэлеканалу CNN паведаміў прадстаўнік паліцыі.

Бізнэсовец і адзін з найбуйнейшых экспарцёраў спецый у краіне затрыманы паводле падазрэння ў садзейнічанні падазраваным у тэрарызме. Прадстаўнік паліцыі таксама распавёў, што ўсе сямейнікі Ібрагіма, хутчэй за ўсё, знаходзяцца пад вартай.

Невядомым застаецца месцазнаходжанне мусульманскага прапаведніка Захрана Хашыма, якога ўлады ўважаюць за арганізатара тэрактаў. Ён з'яўляецца ў роліку, апублікаваным чальцамі тэрарыстычнай групоўкі «Ісламская дзяржава», але не вызначана, ці загінуў ён падчас выбухаў, піша ВВС.

Напярэдадні ў парламенце Шры-Ланкі была апублікаваная інфармацыя аб тым, што індыйскія спецслужбы 4 красавіка папярэдзілі сваіх шры-ланкійскіх калег аб надыходзячым тэракце. Аднак кіраўнікі сілавых структур з невядомых дагэтуль прычын не распачалі ў сувязі з гэтым ніякіх дзеянняў.

Прэм'ер-міністр і прэзідэнт краіны сцвярджаюць, што ім не паступала ніякай інфармацыі з гэтай нагоды. Пасля тэракту адхілены кіраўнік мінабароны Шры-Ланкі, таксама паведамляецца, што ўлады распачалі крокі для звальнення галоўнага інспектара паліцыі.

Амбасада Злучаных Штатаў у Каломба заявіла аб захаванні пагрозы тэрактаў у Шры-Ланцы. Паводле звестак амерыканскай дыпмісіі, чарговыя выбухі ў грамадскіх месцах могуць адбыцца без папярэджання.

Раней улады Шры-Ланкі звязалі серыю тэрактаў у краіне з атакай на мячэці ў Новай Зеландыі ў сакавіку гэтага года. Паводле папярэдніх вынікаў расследавання, арганізатары выбухаў называлі іх помстай за напад у Крайстчорчы.

Восем выбухаў адбыліся на Шры-Ланцы раніцай у нядзелю, 21 красавіка, падчас святкавання каталіцкага Вялікадня. Тэрарысты атакавалі тры царквы і тры гатэлі. Яшчэ два выбуховыя прыстасаванні былі прыведзеныя ў дзеянне праз некалькі гадзін.

Улады Шры-Ланкі ўсклалі адказнасць за выбухі на мясцовую джыхадысцкую групоўку «Джамаат ат-Таўхід аль-Ватанен». Пра сваю адказнасць таксама заявіла тэрарыстычная групоўка «Ісламская дзяржава».