Беларусы хвалююцца: Цяпер усе банкі ўвядуць камісію за зняцце гатоўкі?

Журналісты разбіраліся, што адбываецца.

Навіна аб тым, што «Белінвестбанк» абмяжоўвае суму гатоўкі, якую можна зняць у яго ж банкаматах, усхвалявала многіх чытачоў, піша onliner.by.

Асабліва пасля таго, як навіна аб увядзенні лімітаў з'явілася на сайце «Альфа-Банка». Многія ўгледзелі ў гэтым сувязь і нейкую агульную тэндэнцыю. Учора і сёння чытачы абмяркоўваюць паведамленне «Альфа-Банка» ад 22 красавіка (якога, дарэчы, ужо няма на сайце).

У ім было сказана пра тое, што банк уводзіць ліміты па картках з прывілеямі. З 1 траўня максімальная сума бясплатнага зняцця з такіх картак у банкаматах «Альфа-Банка» складзе 5000 рублёў, 2500 даляраў ці еўраў. За месяц. Калі ж трэба здымаць больш, то тады давядзецца заплаціць 3% камісіі, але не менш за 3 рублі на беларускіх рахунках.

- Магчыма, агулам у краіне рэгулятар пачаў ціснуць на банкі? І гэта толькі першыя? - напісаў у рэдакцыю чытач Ягор. З аналагічнымі пытаннямі да нас звярнуліся і іншыя чытачы. Таксама гэтую тэму актыўна абмяркоўваюць і ў каментарах пад навіной аб ліміце ў «Белінвестбанку».

Сам «Альфа-Банк» запэўнівае: ніякай тэндэнцыі тут няма, і падзеі ніяк не звязаныя. Больш за тое, са слоў банка, ліміты не закрануць звычайныя карты без прывілеяў. Для іх сітуацыя застанецца ранейшай: грошы ў банкаматах «Альфа-Банка» і банкаў-партнёраў можна здымаць, як і раней, без камісій і якіх-небудзь абмежаванняў.

Таксама ў банку адзначаюць, што ліміты ў бясплатным зняцці гатоўкі па картах з прывілеямі пачалі дзейнічаць з самага запуску прадукту ў 2018 годзе. На той момант яны складалі ад 100 да 200 рублёў у залежнасці ад набору прывілеяў. Гэта значыць, без камісіі па такой карце кліенты маглі здымаць ад 100 да 200 рублёў ва ўсіх банкаматах, нават замежных, а за бóльш вялікія сумы плацілі камісію.

- Цяпер гэтыя ліміты дзейнічаюць толькі для банкаматаў банкаў-партнёраў і іншых банкаў свету, - патлумачылі ў прэс-службе банка. - У банкаматах жа «Альфа-Банка» з 1 траўня сума зняцця без камісіі складзе 5000 рублёў ці ж 2500 даляраў ці еўраў на месяц. Са звычайных картак здымаць гатоўку па-ранейшаму можна бясплатна ў банкаматах «Альфа-Банка» і банкаў-партнёраў.

Гэта значыць, калі перакінуць грошы з прывілеяванай карткі на звычайную, здымаць гатоўку можна будзе без якіх-небудзь праблем.

А што ў астатніх?

У найбуйнейшых банках краіны кажуць, што не збіраюцца ўводзіць ліміты, як у «Белінвестбанку». Прынамсі, найбліжэйшым часам.

- У нас нічога не змянілася і не будзе змяняцца з траўня. Прынамсі, такой інфармацыі ад кіраўніцтва не прыходзіла, - кажуць у кол-цэнтры «Беларусбанка». - Па картах у нас ёсць ліміты зняцця гатоўкі ў прынцыпе. Гэта значыць, больш за нейкую пэўную суму за дзень зняць нельга, таксама ёсць ліміты ў саміх банкаматах, усё залежыць ад загружанасці гатоўкай.

Аналагічная сітуацыя ў «Белаграпрамбанку», «БПС-Ашчадбанку» і «БелВЭБ». Таксама не збіраюцца ўводзіць ліміты ў «Белгазпрамбанку» і «МТБанку».

- Ніякай інфармацыі аб увядзенні камісіі за зняцце гатоўкі ў нашых банкаматах няма, - запэўнілі і ў «Прыёрбанку».

Не пацвярджаюць інфармацыю пра нейкія рэкамендацыі для банка як у Нацыянальным банку, так і ў асацыяцыі беларускіх банкаў.