Лекары навучыліся ператвараць тлушч на жываце ў кубікі прэса

Метамарфоза магчымая з дапамогай кропкавай ліпасакцыі.

Часам для таго, каб прымусіць сябе цягнуцца ў трэнажорную залу, даводзіцца прыкладаць нашмат больш намаганняў, чым на самай трэніроўцы. Аднак цяпер гультаям, якія хочуць валодаць фігурай Геракла і Апалона, дапамогуць пластычныя хірургі. Даследнікі з Медыцынскай школы Леанарда Мілера ва Універсітэце Маямі распрацавалі новую тэхніку пластычнай хірургіі, дзякуючы якой пласт тлушчу на жываце будзе выглядаць у дакладнасці як кубікі прэса, піша «Популярная механика».

Як апісваюць самі навукоўцы ў артыкуле, апублікаваным на старонках Тhe Journal of the American Society of Plastic Surgeons, метад заснаваны на ліпасакцыі - працэсе, падчас якога тлушч даслоўна адсмоктваецца з цела чалавека з дапамогай пластыкавай трубкі і электрапомпы. Пластычны хірург выкарыстоўвае тыя ж інструменты для таго, каб кропкава выдаліць тлушч і падкрэсліць тым самым натуральныя лініі цягліц жывата. У залежнасці ад пераваг пацыента, «тлушчавы прэс» можа быць адаптаваны для больш мяккага жывата ці, наадварот, вылучаць усе анатамічныя асаблівасці.

Варта заўважыць, што калі вы ні дня не правялі ў трэнажорнай зале, то гэтая працэдура не дапаможа ператварыцца ў мадэль усяго за адзін дзень. У даследаванні ўдзельнічалі 50 пацыентаў (26 мужчын і 24 жанчыны, сярэдні ўзрост - 26 гадоў), якія ўжо былі ў нядрэннай фізічнай форме дзякуючы здароваму харчаванню і рэгулярным фізічным практыкаванням. Яны звярнуліся ў клініку таму, што жадалі пазбавіцца ад непажаданых адкладаў тлушчавай тканіны на жываце, якія не маглі «скінуць» падчас трэніровак.

Як і ў большасці хірургічных практык, для гэтай методыкі таксама існуе шэраг канкрэтных рэкамендацый, якія неабходна выконваць ужо пасля аперацыі. Яны ўключаюць у сябе абавязковае нашэнне анатамічных падвязак цягам некалькіх тыдняў, каб па меры гаення тканін «пратручаныя» пласты не рассмакталіся. Акрамя таго, неабходна рэгулярна назірацца ў лекара і весці здаровы лад жыцця, уключаючы строгія фізічныя практыкаванні, каб тлушчавыя зморшчыны не абвіслі і не сталі адрузлымі.

Так што, на жаль, медыцына пакуль што не можа ператварыць вас у атлета на ўзмах чароўнай палачкі - для добрай фігуры ўсё адно давядзецца старанна працаваць над сабой.