У Менску са шматпавярховіка эвакуявалі людзей
16- 26.04.2019, 15:45
- 39,446
Жыхары кажуць пра пагрозу разбурэння дома.
У Менску на вуліцы Шырокай, 3, эвакуявалі ўсіх жыхароў новабудоўлі, якая была здадзеная ў эксплуатацыю ў 2014 годзе. Як выявілася, жыхары яшчэ паўтара гады таму пісалі звароты ў розныя інстанцыі з просьбай разгледзець пытанне з апорнай калонай у другім пад'ездзе. Тыдзень таму спецыялісты прыступілі да рамонту. Як мяркуецца, у выніку гэтых работ пачалося разбурэнне калоны, што прывяло да пагрозы руйнавання дома, піша tut.by.
- Нам сказалі ўзяць пашпарты і выйсці ўсім на вуліцу. Дом ачапілі, нікога унутр не пускаюць. На фасадзе бачныя расколіны, - распавёў мясцовы жыхар Аляксандр.
«26 красавіка 2019 года ў жылым доме №3 на вул. Шырокай будуць праводзіцца працы для ўзмацнення маналітнай калоны другога пад'езду. З мэтай гарантавання бяспекі жыхароў дома і дадатковых захадаў засцярогі на час рамонтных работ будуць арганізаваныя мерапрыемствы для вываду. Рамонтныя работы прадоўжацца ад 4 да 6 гадзін. Арыенціровачны час заканчэння - 20.00», - пракаментавалі сітуацыю ў Менгарвыканкаме.
У адміністрацыі Савецкага раёна прынеслі прабачэнні за дастаўленыя нязручнасці і папрасілі жыхароў дома паставіцца з разуменнем да часовых зменаў.
Цяпер спецыялістамі камунальных службаў раёна праводзіцца пакватэрная абвестка жыхароў.
Часовае знаходжанне жыхароў арганізаванае ў сярэдняй школе №178, размешчанай па адрасе: вул. Усходняя, 68.
Дом узводзіў забудоўшчык КУП «Управа капітальнага будаўніцтва адміністрацыі Савецкага раёна Менска», і аб'ект быў даўгабудам.
Спецыялісты растлумачылі журналістам, што цяпер будаўнікі будуць умацоўваць калону. Для гэтага побач усталююць двутаўр (сталёвую бэльку), якая павінна ўзяць на сябе нагрузку. А ўжо затым на яе саму - датчыкі, каб адсочваць, што сітуацыя стабілізавалася.
У МНС удакладнілі, што інфармацыя аб змене цэласнасці маналітнай калоны ім паступіла прыкладна а 14.00.
Выявілася, яшчэ ў сакавіку 2018 года эксплуатуючай арганізацыяй было заўважанае «ўтварэнне гарызантальных і вертыкальных расколін з адслаеннем (разрывам) тынкоўкі». Службы горада правялі шэраг неабходных мерапрыемстваў, і быў распрацаваны праект умацавання будаўнічых канструкцый дома шляхам усталявання металічнага двутаўра.
Цяпер працы на месцы вядуць работнікі «Будтрэста №1». Акрамя іх на месцы - аператыўная група з камісіі ў надзвычайных сітуацыях пры адміністрацыі Савецкага раёна Менска, кіраўніцтва КУП «ЖКГ Савецкага раёна Менска» і прадпрыемствы-забудоўшчыка.
Як паведамляе карэспандэнт з месца падзей, людзі пакінулі толькі другі пад'езд, а ў астатніх двух знаходзіцца можна.
- У панядзелак прыйшлі будаўнікі і паставілі падпоркі калоны. У тых, хто жыве ў «двухпакаёўках» па адным стаяку, перасталі зачыняцца ўваходныя дзверы. У кватэрах пайшлі па сценах расколіны, стала сыпацца тынкоўка, - распавядае мясцовая жыхарка Наталля.
Паводле яе слоў, ужо ўчора ўвечары сабралася камісія, а сёння прыехала намесніца кіраўніка адміністрацыі раёна.
- Мы пайшлі, прадчуваючы, што нешта здарыцца, спыталі, у чым справа. І нам людзі з камісіі сказалі, што будзе эвакуацыя. Тады мы сталі ўсім перадаваць інфармацыю па нашым вайбер-чату, - дадала Наталля.
Цяпер у праблемнага дома знаходзіцца намесніца кіраўніка адміністрацыі Савецкага раёна Ала Санкоўская і кіраўнік раёна Юрый Трушчанка, а таксама намеснік старшыні Менгарвыканкама Аляксандр Дараховіч.
Дараховіч паведаміў, што надзвычайнай сітуацыі няма, намечаныя работы для ўзмацнення канструкцый паспрабуюць правесці ў самыя кароткія тэрміны.
Рамонтныя работы ўжо пачаліся. Іх абяцаюць скончыць, нагадаем, да 20.00.