Генадзь Фядыніч: Некаторыя думаюць, што воблака само пройдзе і сонца заззяе
- 26.04.2019, 16:05
- 8,472
Уладам трэба нагадваць аб праблемах, толькі такім чынам можна чагосьці дамагчыся.
Адзін з лідараў прафзвязу РЭП Генадзь Фядыніч распавёў «Радыё Рацыя», што незалежныя прафзвязы не выйдуць з акцыяй 1 траўня:
- Мы планавалі выйсці на вуліцу 1 траўня, але, калі разглядалі гэтае пытанне на радзе Беларускай канфедэрацыі дэмакратычных прафзвязаў, то там прынялі пастанову не ладзіць ніякія мерапрыемствы ў гэты дзень. І я не разумею такога падыходу. На незалежныя прафзвязы апошнім часам ідзе сур'ёзны накат, а мы не здольныя гучна пра гэта заявіць? Не здольныя вывесці людзей на вуліцу? Некаторыя, мабыць, думаюць, што воблака само пройдзе, і сонейка заззяе. Не заззяе. Трэба ўладам нагадваць пра праблемы, толькі такім чынам можна чагосьці дамагчыся.
- Магчыма, няма грошай, каб аплачваць паслугі міліцыі за ахову парадку на акцыі?
- Магчыма, і гэта, але ў першую чаргу трэба гаварыць пра гатоўнасць правесці мітынг. Я думаю, што Беларускі кангрэс дэмакратычных прафзвязаў трохі спалохаўся, што шмат людзей выйшла з незалежных прафзвязаў, але ў такім выпадку наадварот трэба рабіць нейкія захады для павышэння актыўнасці. Але цяпер адбываецца нешта незразумелае.