Financial Times: Brexit пагражае фунту стратай статусу рэзервовай валюты
2- 29.04.2019, 20:13
- 9,153
Фунт - чацвёртая па папулярнасці рэзервовая валюта ў свеце пасля даляра ЗША, еўра і ены.
Выхад Вялікабрытаніі з Еўразвязу прывядзе да паслаблення, калі не страты фунтам стэрлінгаў статусу рэзервовай валюты. Пра гэта піша Financial Times (пераклад - thebell.io) са спасылкай на апытанне спецыялізаванага часопіса Central Banking Publications.
Выданне апытала 80 кіраўнікоў рэзервамі цэнтрабанкаў з сумарнымі актывамі $7 трлн. Больш за трэць заявілі, што пасля Brexit знізяць долю фунта ў рэзервах.
Гэта будзе азначаць паслабленне брытанскай валюты і рост кошту пазык, які цяпер адносна ніжэйшыя менавіта праз рэзервовы статус фунта.
Некаторыя кіраўнікі прыглядаюцца да юаня і бондаў краін, якія развіваюцца ў якасці рэзервовых актываў.
«Відавочна, што яны прадбачаць уплыў Brexit на рэзервы ў фунтах. Разрыў з ЕЗ бачыцца крыніцай нявызначанасці і валацільнасці, што кіраўнікам рэзервамі не падабаецца па азначэнні. Яны ўважаюць Brexit разбуральным - як у плане рэакцыі рынку, так і асаблівасцяў ўліку і дачыненняў з трэцімі бакамі», - прыводзіць газета словы выдаўца Central Banking Publications Ніка Карвера.
Фунт - чацвёртая па папулярнасці рэзервовая валюта ў свеце пасля даляра ЗША, еўра і ены - на яго прыпадае 4,5% сусветных валютных рэзерваў. Пасля рэферэндуму аб Brexit у чэрвені 2016 года даляравы эквівалент брытанскай валюты амаль не змяніўся, хоць яе курс за гэты час знізіўся з $1,45 да $1,29, піша FT. Гэта азначае, што цэнтрабанкі ўвесь гэты час чакалі канчатковых умоў выхаду Вялікабрытаніі з ЕЗ.
Еўразвяз у гэтым месяцы дазволіў Вялікабрытаніі падоўжыць тэрмін прыняцця пастановы аб Brexit да 31 кастрычніка.
Міжнародныя рэзервы расейскага ЦБ у сакавіку аднавіліся да «дакрымскага» ўзроўню - амаль $490 млрд. Летась на фунт прыпадала 7,8% рэзерваў.