Як радзіма Лукашэнкі апынулася ў аўтсайдарах паводле паказчыкаў малака і мяса
9- 5.04.2019, 10:02
- 14,476
Каровы на фермы «Сліжы» сталі толькі нагодай.
Ці патрабавала сітуацыя ў аграпрамысловым комплексе Магілёўскай вобласці радыкальных кадравых перамен, ці яны сталі вынікам празмерна эмацыйнай рэакцыі на «аб-ных» кароў?
«Заўтра тваёй краіны» паспрабавала знайсці прычыну нядаўніх гучных адставак, прааналізаваўшы стан аграрнай галіны гэтага рэгіёну Беларусі.
Пасля нядаўняга візіту Лукашэнкі на малочна-таварную ферму холдынгу «Купалаўскі» ў Шклоўскім раёне цягам двух дзён пазбавіліся сваіх пасадаў віцэ-прэм'ер Міхаіл Русы, міністр сельскай гаспадаркі і харчавання Леанід Заяц, старшыня Магілёўскага аблвыканкама Уладзімір Даманеўскі, памочнік прэзідэнта ў гэтым рэгіёне Генадзь Лаўрэнкоў і кіраўнік Шклоўскага раёна Васіль Віцюноў.
Экспэрты мяркуюць, што каровы на ферме «Сліжы», умовы ўтрымання якіх Лукашэнка параўнаў з Асвенцімам, сталі толькі нагодай. Дыктатар даўно выказваў незадаволенасць аўтсайдарскаму статусам Магілёўшчыны. Ён проста скарыстаўся выпадкам, каб праз кадравыя пастановы выправіць сітуацыю.
Паводле статыстычных звестак за 2018 год, Магілёўшчына заняла апошняе месца ў вытворчасці галоўнага нацыянальнага сыравіннага рэсурсу - малака. Фермы рэгіёну вырабілі 689,2 тысяч тон малака. Гэта на 6,1% менш, чым былі надоі ў 2017 годзе. Толькі адзін з 21-га раёнаў у мінулым годзе здолеў перасягнуць паказчыкі папярэдняга перыяду. Ім, дарэчы, быў праінспектавалі кіраўніком дзяржавы Шклоўскі раён (прырост 5%).
Усяго ў краіне у 2018 годзе было выраблена звыш 7 млн тон малака, а прырост у гаспадарках Берасцейскай, Гарадзенскай і Менскай абласцей склаў 0,7%.
Паводле паказчыку эфектыўнасці - сярэдні ўдой малака з каровы - Магілёўская вобласць (4 037 кілаграмаў) пакуль апярэджвае самы горшы рэгіён краіны Віцебшчына (3 865 кілаграмаў). Але ў мінулым годзе яе гаспадаркі зрабілі велізарны крок назад, дапусціўшы самае значнае зніжэнне ўдояў - на 257 кілаграмаў з каровы.
Для параўнання: у Гомельскай і Віцебскай абласцях сярэднія надоі скараціліся, адпаведна, на 131 і 135 кілаграмаў.
Сярэдні ўдой малака на карову ў краіне ў мінулым годзе склаў 5 004 кілаграма (прырост на 15 кілаграм у параўнанні з 2017 годам). Толькі 4 з 21 раёнаў Магілёўшчыны змаглі дасягнуць і перавысіць гэты паказчык (Кіраўскі, Шклоўскі, Магілёўскі і Чачэрскі). А ў разрэзе гаспадарак на Магілёўшчыне не знайшлося ніводнай, якая б ўвайшла паводле гэтага паказчыку нават у топ-50. Самы высокі сярэдні надой у Магілёўскай вобласці ў «Агракамбінаце «Зара»(Магілёўскі раён) - 8 067 кілаграма. Гэта - 51-е месца ў рэйтынгу эфектыўнасці.
Не найлепшым чынам ідуць у Магілёўскай вобласці справы з вытворчасцю мяса жывёлы і птушкі.
У краіне ў цэлым у мінулым годзе было выраблена яго на 0,7% менш, чым годам раней - больш за 1,7 млн тон.
Магілёўская разам з Берасцейскай, Гарадзенскай і Гомельскай абласцямі ўвайшла ў спіс рэгіёнаў, дзе адбылося падзенне. Менш мяса зрабіла толькі Гомельшчына. У Гомельскай вобласці вытворчасць мяса жывёлы і птушкі склала 205 118 тон (падзенне на 8%), у Магілёўскай - 205 482 тон (падзенне на 2,9%). І калі б не прыватная бройлерная фабрыка «Сервалюкс Агра», якая павялічыла выпуск мяса птушкі (на 12%), то Магілёўшчына зноў апынулася б на апошнім месцы.