Як у Беларусі «па-новаму» плацяць за ЖКГ

Змены не закранулі «дармаедаў».

Беларусы з сакавіка па-новаму аплачваюць некаторыя жыллёва-камунальныя паслугі. Так, на многія ЖКП скасавалі дыферэнцыраваныя тарыфы. Пры гэтым улады прынялі яшчэ адну важную змену: у дачыненні да ўсіх кватэр, у якіх ёсць хаця б адзін зарэгістраваны чалавек, аплату за ЖКП цяпер налічваюць па тарыфах, што субсідуюцца. Выключэнне складуць дармаеды і тыя, хто здае жыллё ў арэнду на суткі, піша «Брестская газета».

З сакавіка льготныя тарыфы на ЖКП прымяняюцца да ўсіх кватэр, у якіх зарэгістраваны па месцы жыхарства хаця б адзін чалавек. Да гэтага субсідаваныя тарыфы ўжывалі ў залежнасці ад таго, ці з'яўляецца зарэгістраваны плацельшчыкам ЖКП (калі не, то налічвалі па поўных тарыфах), і ў залежнасці ад ступені сваяцтва ўласніка жылля і таго, хто ў ім прапісаны.

Да прыкладу, калі ў кватэры былі зарэгістраваныя дзеці, бацькі або муж уласніка жылля, то квітанцыю выстаўлялі па льготных тарыфах, а калі яго бабуля - то ўжо поўным тарыфам (акрамя платы за ваду). Так і ў сітуацыі, калі ўнук быў зарэгістраваны ў кватэры, якая аформленая на бабулю, то выстаўлялі поўную квітанцыю (акрамя платы за ваду). З 1 сакавіка ў гэтай сітуацыі выстаўляюць рахункі за ЖКП ужо па льготных тарыфах.

У сітуацыі, калі хто-небудзь са сваякоў аформіць у дарэнне на вас жыллё, пры гэтым застанецца ў ім жыць, а новы ўласнік не будзе пакуль рэгістравацца, плату за жыллёва-камунальныя паслугі з 1 сакавіка налічваюць па льготных тарыфах. Раней - па поўных (калі дарэнне афармлялі не сябры сям'і).

Але змены не распаўсюджваюцца на тых, што не былі заняты ў эканоміцы, якія зарэгістраваныя ў кватэры. За падагрэў вады яны, як і раней, будуць плаціць па поўных тарыфах (а з 1 кастрычніка - яшчэ за ацяпленне).

Для кватэр, у якіх ніхто не зарэгістраваны, па-ранейшаму будуць выстаўляць рахункі па поўных тарыфах. Па эканамічна абгрунтаваных расцэнках, як і раней, будуць аплачваць камуналку таксама ўласнікі жылля, у якім яны зарэгістраваныя, але здаюць яго ў наём для кароткачасовага пражывання.