Улады Берасця забаранілі 15 мітынгаў супраць акумулятарнага завода «праз кляшчоў»

Са студзеня мінулага года да сённяшняга дня актывісты падалі больш за сотню заявак на правядзенне акцый пратэсту.

Улады забаранілі 15 мітынгаў супраць акумулятарнага завода, запуск якога павінен адбыцца ў траўні, «праз кляшчоў».

Берасцейскія актывісты звярнуліся да ўладаў з просьбай дазволіць правесці з 13 да 17 траўня 15 мітынгаў на пляцоўцы каля сцэны ў парку Воінаў-інтэрнацыяналістаў.

У сваім адказе заяўніку Раману Кісляку ўлады паведамілі, што менавіта ў гэтыя дні ў парку запланаваны мерапрыемствы супраць кляшчоў.

«Нам адмаўляюць у любым выпадку, таму мы падаем заяўкі на правядзенне мітынгаў у разнастайныя месцы і час, каб праверыць, якія яшчэ прычыны для адмовы, яны прыдумаюць. Гэтым разам нам адмовілі, бо ў парку, маўляў, плануюцца мерапрыемствы супраць кляшчоў», - распавёў «Белсату» берасцейскі актывіст Аляксандр Кабанаў.

Больш за год берасцейцы пратэстуюць супраць будаўніцтва акумулятарнага завода «iPower» у свабоднай эканамічнай зоне «Берасце». Жыхары горада сцвярджаюць, што прадпрыемства можа негатыўна паўплываць на экалогію ў рэгіёне.

Са студзеня мінулага года да сённяшняга дня актывісты падалі больш за сотню заявак на правядзенне ў Берасці і Берасцейскім раёне акцый пратэсту. Улады санкцыянавалі толькі мітынг «берасцейкі супраць свінцу» ў красавіку 2018-га. Тады ў парк Воінаў-інтэрнацыяналістаў прыйшло блізу двух тысяч чалавек.