Кітай увёў падаткі на амерыканскія тавары ў адказ на пастанову Трампа
- 13.05.2019, 17:46
- 8,464
Улады КНР падымуць падатак на асобныя амерыканскія тавары ад 5 да 25 адсоткаў.
Кітай павысіў падаткі на амерыканскія тавары, паведамляюць СМІ са спасылкай на камісію ў тарыфнай палітыцы Дзяржаўнага савета КНР. Пастанова прынятая ў якасці люстранога захаду пасля таго, як аб павышэнні падаткаў у дачыненні да Кітая абвясціў прэзідэнт ЗША Дональд Трамп, паведамляе «Радыё Свабода».
Паведамляецца, што ўлады КНР падымуць падатак на асобныя амерыканскія тавары ад 5 да 25 адсоткаў. Змены закрануць тавары агульным коштам блізу 60 мільярдаў даляраў. Пры гэтым ўвядзенне захаду адкладзенае да 1 чэрвеня, што дазваляе ЗША і Кітаю сесці за стол перамоў з мэтай скасаваць абмежаванні ў двухбаковым парадку, адзначае The New York Times.
Павышэнне падаткаў з боку ЗША з 10 да 25 адсоткаў, якое анансаваў Трамп, закране перш за ўсё аўтазапчасткі. Агулам падатак будзе ўведзены ў дачыненні да кітайскіх тавараў агульным коштам 200 мільярдаў даляраў.
Прэзідэнт ЗША раней перасцерагаў КНР перад увядзеннем у адказ санкцый і паабяцаў, што павышэнне падаткаў Вашынгтонам не адаб'ецца на амерыканцах, якія будуць набываць кітайскія тавары.
«Ужо не будзе з кім будзе рабіць бізнэс. Вельмі дрэнна для Кітая, вельмі добра для ЗША! Але Кітай шмат гадоў [настолькі] карыстаўся Злучанымі Штатамі, што яны [цяпер] далёка наперадзе (нашы прэзідэнты недастаткова добра працавалі). Так што Кітаю не варта адказваць - будзе толькі горш!», - напісаў у твітэры Трамп.
Цяперашні прэзідэнт ЗША ў сваёй перадвыбарнай кампаніі абяцаў увядзенне шэрагу захадаў для абароны амерыканскіх кампаній ад замежных тавараў. Трамп неаднаразова абвінавачваў папярэдніх лідараў краіны ў недастаткова сур'ёзных, на ягоную думку, намаганнях для прадухілення ўплыву КНР на амерыканскі рынак.