«Працаваў 40 гадоў, і ўсё страціў»

Пачаўся яшчэ адзін суд паводле «справы медыкаў» - над галоўным лекарам 9-й лякарні ў Менску.

Сёння суд Маскоўскага раёна Менска пачаў разглядаць крымінальную справу ў дачыненні да былога галоўнага лекара 9-га шпіталю Валерыя Кушнярэнкі, піша tut.by.

Ён быў затрыманы летам 2018 года, змешчаны ў ізалятар і не так даўно канваіры дастаўлялі яго ў іншы суд, дзе Кушнярэнка выступаў у якасці сведкі паводле справы свайго падначаленага загадчыка эндаскапічным аддзяленнем Андрэя Саўчанкі.

На працэс Валерыя Кушнярэнку прыйшлі падтрымаць блізкія і родныя. Ужо былы галоўны лекар былой 9-й лякарні (установа перайменаваная ў Менскі навукова-практычны цэнтр хірургіі, транспланталогіі і гематалогіі) знаходзіцца за кратамі амаль год, яму выстаўленае абвінавачанне паводле ч 2 арт 430 КК (Атрыманне хабару ў вялікай суме). Кушнярэнку 65 гадоў, жанаты, мае вышэйшую адукацыю і амаль 20 гадоў кіраваў вядомай 9-й сталічнай лякарняю.

Абвінавачванне Валерыю Кушнярэнку падобнае да абвінавачвання іншых фігурантаў «справы медыкаў». Са звестак следства, за перамогу ў тэндары пэўнага пастаўшчыка медыцынскага абсталявання або расходных матэрыялаў былы галоўны лекар атрымліваў хабар.

- Прыняў для сябе ў службовым кабінеце 3 тысячы даляраў, - зачытвае абвінавачанне пракурор Яўген Сілякоў.

Усяго ў матэрыялах справы фігуруе 8 эпізодаў атрымання хабару, сумы розныя - ад 300 даляраў да 3 тысяч. Усяго за некалькі апошніх гадоў Валерый Кушнярэнка, сцвярджае следства, атрымаў 13 800 даляраў. У 2017 годзе акрамя трох тысяч даляраў галоўнаму лекару прадстаўнік камерцыйнай кампаніі падарыў яшчэ памятную сярэбраную манету з выявай Божай Маці коштам 500 даляраў.

- Я прызнаю сябе вінаватым цалкам, - кажа з клеткі абвінавачаны Кушнярэнка.

Падчас допыту галоўны лекар распавядае, што ў 2008 годзе пачалася рэканструкцыя лякарні, яна праходзіла ў некалькі этапаў. Медтэхніку і матэрыялы ў гэтыя гады закуплялі з уласных сродкаў і цэнтралізавана праз Міністэрства аховы здароўя.

- Да ўсіх пастаўшчыкоў я ставіўся аднолькава. Усе аплаты мы праводзілі своечасова, - распавядае былы галоўны лекар. - Цягам апошніх 4-5 гадоў у клініцы не было крэдыторскай запазычанасці, усе аплаты мы ажыццяўлялі своечасова.

З адным з хабарадавальнікаў, кіраўніком прадстаўніцтва нямецкай кампаніі Fresenius Сабалеўскім, Валерый Кушнярэнка пазнаёміўся ў 1995 годзе.

- У 1993 годзе ў нашай лякарні пачаў функцыянаваць цэнтр перасадкі касцявога мозгу, і Fresenius пастаўляла абсталяванне. Я тады быў загадчыкам аддзялення, працаваў на гэтым абсталяванні, - успамінае Валерый Кушнярэнка. - А з 1995 года яго стала абслугоўваць прадстаўніцтва кампаніі ў Беларусі. Так мы пазнаёміліся. (...) Хачу сказаць, ніколі грашовых сродкаў не патрабаваў, ніякіх дамоўленасцяў не было. Нават выказаць здагадку не мог, што хтосьці пасля пастаўкі прыйдзе і прынясе грошы.

- Як вам перадаваліся грошы? - удакладняе пракурор.

- Гэта ўсё было ў маім кабінеце. Грошы былі ў канверце і ў мяшку. Часцей за ўсё пакет ставілі на стол, - адказвае абвінавачаны.

Апошні хабар Валерый Кушнярэнка атрымаў 15 чэрвеня 2018 года, а ўжо 5 ліпеня быў затрыманы. Усю суму - 13 800 даляраў, «атрыманую злачынным шляхам», былы галоўны лекар кампенсаваў.

- Як вы ставіцеся да зробленага? - пытаецца ў свайго падабароннага адвакат Эдуард Якубоўскі.

Кушнярэнка адказвае не адразу, з голасу чуваць, як ён хвалюецца:

- У выніку таго, што адбылося, а я прапрацаваў у ахове здароўя 40 гадоў, я страціў свой твар, сваё добрае імя. Глыбока раскайваюся ў гэтым. Тое, што ўсе страціў, самае важнае.

Нагадаем, паводле гучнай «справы медыкаў» вынеслі ўжо не адзін прысуд. Былога галоўнага лекара Рэспубліканскага цэнтра медыцынскай рэабілітацыі і бальнеалячэння Сяргея Карыцьку за атрыманне хабару на 2 тысячы даляраў прысудзілі да 2,5 гадоў «хатняй хіміі».

Паводле прысуду экс-кіраўнік РНПЦ траўматалогіі і артапедыі Аляксандр Бялецкі атрымаў 7,5 годоў пазбаўлення волі. Намеснік міністра аховы здароўя Ігар Ласіцкі - 6 гадоў пазбаўлення волі ў калоніі ва ўмовах узмоцненага рэжыму з канфіскацыяй маёмасці, галоўны лекар 12-й стаматалагічнай паліклінікі Уладзімір Краўчонак - пяць гадоў.

Былы кіраўнік Гарадзенскага абласнога міністэрства Андрэй Стрыжак асуджаны на 7,5 гады пазбаўлення волі ў калоніі ўзмоцненага рэжыму з канфіскацыяй маёмасці. А галоўнага лекара Менскай абласной лякарні Андрэя Каралько прысудзілі да 4 гадоў.