Міністру сельскай гаспадаркі паказалі на рост карупцыі ў галіне
10- 15.05.2019, 13:14
- 13,317
Генпракуратура вынесла пісьмовую прапанову міністру сельскай гаспадаркі і харчавання.
Генеральная пракуратура вынесла пісьмовую прапанову аб ліквідацыі парушэнняў закона міністру сельскай гаспадаркі і харчавання Анатолю Хацько пасля праверкі выканання ў сістэме міністэрства антыкарупцыйнага заканадаўства. Пра гэта паведамляе tut.by са спасылкай на прэс-службу ўстановы.
Нагодай да праверкі паслужыла дынаміка карупцыйнай злачыннасці ў сельскагаспадарчай сферы: у 2016 годзе учынена 138 такіх злачынстваў, у 2017 годзе - 200, 2018 года - 235, у першым квартале 2019 году - 35.
«На думку пракурораў, асноўная прычына сітуацыі, якая склалася - брак папераджальных мерапрыемстваў і адсутнасць строгага кантролю за фінансава-гаспадарчай дзейнасцю. Кіраўнікі розных узроўняў, іншыя службовыя асобы не прымалі вычарпальных захадаў для выяўлення і ліквідацыі прычын і ўмоў, якія спрыяюць карупцыі. З-за невыканання працоўнай і выканальніцкай дысцыпліны сталі магчымыя прыпіскі, а таксама фальсіфікацыі дакументаў з мэтай утойвання безгаспадарчасці і недастач. Выяўленыя парушэнні ў забеспячэнні захаванасці маёмасці прадпрыемстваў АПК», - распавялі ў Генпракуратуры.
Там таксама адзначылі, што, як паказала праверка, карупцыйным злачынствам спрыяла і неабгрунтаванае пасрэдніцтва, адсутнасць сістэмы падрыхтоўкі спецыялістаў у галіне закупак. Напрыклад, за арганізацыю закупкі абсталявання завышаным коштам праз пасрэдніцкую структуру да крымінальнай адказнасці прыцягнуты былы вядучы інжынер у забеспячэнні РУП «Віцебскае племпрадпрыемства».
Пракуроры звярнулі ўвагу, што непрыняцце мер да спагнання дэбіторскай запазычанасці стварае карупцыйныя рызыкі ў дамоўнай частцы працы, экспартных пастаўках. Да прыкладу, на момант праверкі запазычанасць перад РУСПП «Магілёўскае дзяржплемпрадпрыемства» была ў 350 арганізацый і індывідуальных прадпрымальнікаў на агульную суму больш як 3,28 млн рублёў, з якой пратэрмінаваная - больш за 2,3 млн рублёў.
Пракуратура таксама раскрытыкавала дзейнасць камісіі ў супрацьдзеянні карупцыі, якая, як правіла, абмяжоўвалася абмеркаваннем вынікаў ведамаснага кантролю, зацвярджэннем планаў работы, разглядам праваахоўнымі органамі іншых пытанняў.
«Нягледзячы на тое што вялікая частка ўчыненых у падпарадкаваных міністэрству арганізацыях карупцыйных правапарушэнняў звязаная з закупкамі, у тым ліку сродкаў абароны раслін, камбікармоў і іншых тавараў, пастаўкамі сельгаспрадукцыі без перадаплаты, камісія не аналізавала прычыны такой сітуацыі, не распрацоўвала і не рэалізоўвала прапановы для яе прадухілення. Міністэрства не выконвала патрабаванне закона аб інфармаванні органаў, якія ажыццяўляюць барацьбу з карупцыяй, аб выяўленых парушэннях антыкарупцыйнага заканадаўства. У Генпракуратуру не накіроўвалася інфармацыя аб службовых асобах, якія парушылі парадак дэкларавання даходаў і маёмасці», - мяркуюць ва ўстанове.
У пісьмовай прапанове Генпракуратура запатрабавала прыцягнуць да дысцыплінарнай адказнасці службовых асоб Міністэрства і падведамных арганізацый, якія дапусцілі парушэнні антыкарупцыйнага заканадаўства, а таксама кепска выконвалі абавязкі для супрацьдзеяння карупцыі.
Пра выяўленыя праверкай парушэнні і прынятыя захады пракуратура праінфармавала ўрад.
Нагадаем, да нядаўніх часоў міністрам сельскай гаспадаркі і харчавання быў Леанід Заяц. Ён узначальваў установу 7 гадоў. Пасля памятнага візіту 26 сакавіка на фермы аграхолдынга «Купалаўскі» ў Шклоўскім раёне, якімі Лукашэнка застаўся вельмі незадаволены, Леанід Заяц быў зняты з пасады: ужо ўвечары 27 сакавіка правадыр падпісаў указ аб адстаўцы кіраўніка Мінсельгасхарча Леаніда Зайца. 3 красавіка ён быў прызначаны губернатарам Магілёўскай вобласці.
Новым міністрам сельскай гаспадаркі і харчавання стаў Анатоль Хацько.