У Гародні ўзбунтаваліся жыхары аднаго з раёнаў
- 16.05.2019, 11:42
- 9,964
Жыхары мікрараёна «Фабрычнага» патрабуюць ад уладаў звярнуць увагу на іх праблемы.
У Гародні жыхары мікрараёна, каб патрапіць у аптэку або банк, вымушаныя дабірацца да Паўднёвага ці Альшанкі. Яны хочуць гэта змяніць, піша сайт hrodna.life.
2 кіламетры да найбліжэйшай аптэкі
Большасць жыхароў былога паселішча «Фабрычнае» - пенсіянеры і маладыя бацькі. Льготы для іх ёсць толькі ў дзяржаўных аптэках. Але аптэкі ў мікрараёне няма: да найбліжэйшай дзяржаўнай - 1,9 км. У два бакі - амаль 4 км. Для паджылых людзей гэта шмат.
«У нас жывуць пенсіянеры, якія з цяжкасцю да крамы даходзяць, - тлумачыць мясцовая актывістка Наталля. - А пра аптэку і гаворкі не ідзе! Даводзіцца ўвесь час прасіць суседзяў. Шмат сем'яў з дзецьмі. Як маці купіць лекі, калі муж, да прыкладу, на працы? Што, кінуць дзяцей дома і гадзіну на Агінскага тупаць або цягнуць хворае дзіця з тэмпературай з сабой?»
У мікрараёне «Фабрычным» жыве блізу 150 пенсіянераў. 85 з іх атрымліваюць пенсію на мясцовай пошце, якую нядаўна хацелі закрыць. Астатнім пералічваюць грошы на карту.
Да бліжэйшага банкамата або аддзялення банка - 2,4 км у адзін бок ці амаль 5 км туды-назад.
«Мы тэлефанавалі шмат разоў, прасілі, усё без выніку, - прадаўжае Наталля. - Цяпер звярнуліся да грамадзянскай ініцыятывы «Гародня» і Аляксандр Лаўрэнцьеў узяўся нам дапамагчы. Разам напісалі зварот, цяпер подпісы збіраем. Суседзі радыя, што справа нарэшце ссунецца з мёртвай кропкі.
Улады «ўвайшлі ў становішча» і захавалі пошту
Адсутнасць аптэкі і банкамата - не адзіная праблема жыхароў мікрараёна. З пачатку вясны пачалі хадзіць чуткі, што закрыюць пошту. Аддзяленне павінна было зачыніцца праз падаражэнне арэндны ў будынку былога Дома Культуры птушкафабрыкі.
«Фабрычныя» актывісты змаглі дамовіцца з прадстаўнікамі адміністрацыі: паштовае аддзяленне пераносяць у будынак крамы «Родны кут».
«Мы вельмі задаволеныя такой пастановай, - наперабой тлумачаць прадаўцы - У нас амаль 150 квадратных метраў гандлёвай плошчы. Згодна з правіламі мы павінны былі ўтаргаваць на 8 000 рублёў за месяц, але раён маленькі і гэта амаль ніколі не ўдавалася. Таму і заробкі былі нізкія. Зараз залу скарацілі амаль на палову, адпаведна і норму таксама. Заробак будзе вышэйшы! На асартыменце гэта ніяк не адаб'ецца».
Мясцовыя жыхары згодныя з такім кампрамісам. У той частцы будынка, дзе будзе пошта, яны просяць паставіць «невялікі аптэчны кіёск» з прэпаратамі першай неабходнасці.
Актывісты спадзяюцца, што гарадская адміністрацыя і ў гэтым выпадку іх пачуе.