Першы намеснік міністра сувязі Дзмітрый Шадко падаў у адстаўку

Сёння ў Telegram з'явілася інфармацыя, што ён быў затрыманы.

Першы намеснік міністра сувязі і інфарматызацыі Беларусі Дзмітрый Шадко падаў заяву аб адстаўцы. Гэтую інфармацыю ён пацвердзіў tut.by.

«У гэты момант знаходжуся ў адпачынку. Некалькі тыдняў таму я звярнуўся ва ўрад з просьбай аб адстаўцы. Спадзяюся, сёння будзе атрыманая згода Лукашэнкі», - сказаў Шадко.

Ён развеяў чуткі пра тое, што пакінуў Беларусь і не мае намеру сюды вяртацца на фоне затрымання гендырэктара «Белтэлекама». «Надалей я збіраюся працаваць і жыць у Беларусі. Проста ўжо пяць гадоў працую ў міністэрстве. Гэта вельмі шматгранны і каштоўны досвед. А цяпер ёсць новыя цікавыя прапановы. Не да пенсіі ж працаваць на адным месцы», - растлумачыў ён.

Сёння ў Telegram-канале блогера NEXTA з'явілася неправераная інфармацыя, што Дзмітрый Шадко затрыманы. Аднак КДБ зняпраўдзіў гэтую інфармацыю ў каментары «Еўрарадыё».

Telegram-канал «Хромой Бес» паведамляе, што хоць Шадзько і на волі, цікавасць сілавых органаў да яго сапраўды ёсць. Таксама сілавікі цікавяцца былымі і дзейнымі работнікі Белтэлекама і Міністэрства інфарматызацыі.

У прэс-службе Мінсувязі сказалі, што Дзмітрый Генадзевіч знаходзіцца «другі тыдзень у планавым адпачынку».

Дзмітрый Шадко нарадзіўся ў 1979 годзе ў Менску. Скончыў БДУІР і Акадэмію кіравання пры прэзідэнце. Працаваў у ЦК БПСМ, памочнікам генеральнага дырэктара, вядучым спецыялістам ЗАТ «ТКД Юніспектр», адказным сакратаром, намеснікам галоўнага рэдактара, а затым і галоўным рэдактарам часопіса «Планета», які заснаваў «Белтрансгаз». У 2011 годзе Шадко стаў намеснікам міністра інфармацыі, а праз некалькі гадоў першым намеснікам міністра сувязі і інфарматызацыі.