У Казахстане арыштавалі палітолага Сыраежкіна паводле справы «аб дзяржаўнай здрадзе»

Сыраежкін з'яўляецца галоўным навуковым супрацоўнікам Казахстанскага інстытута стратэгічных даследаванняў.

У Казахстане арыштавалі навукоўца-кітаіста і палітолага Канстанціна Сыраежкіна паводле падазрэння ў дзяржаўнай здрадзе.

Пра гэта паведамляе мясцовы партал «Inform Бюро» са спасылкай на прэс-службу Камітэта нацыянальнай бяспекі (КНБ) краіны.

У камітэце заявілі, што 15 студзеня супраць яго распачалі крымінальную справу паводле арт. 175 ч. 1 КК Казахстана (дзяржаўная здрада). У прэс-службе дадалі, што 19 лютага суд Алматы адправіў навукоўца пад арышт.

Інфармацыю пацвярджае партал Zakon.kz. У КНБ не далі іншую інфармацыю, спаслаўшыся на права не выдаваць звесткі дасудовага расследавання.

Сыраежкін з'яўляецца галоўным навуковым супрацоўнікам Казахстанскага інстытута стратэгічных даследаванняў (КІСД) пры прэзідэнце, доктарам палітычных навук, прафесарам і сябрам-карэспандэнтам Казахстанскай Акадэміі сацыяльных навук.

У пачатку траўня партал «ЦентрАзия» паведамляў пра затрыманне Сыраежкіна спецслужбамі Казахстана. Ён адзначаў, што палітолага западозрылі ў шпіянажы. Дырэктар Казахстанскага бюро ў правах чалавека Яўген Жоўціс распавядаў «Радио Азаттык», што Сыраежкін перастаў выходзіць на сувязь з калегамі ў лютым.