NEXTA: У смерці афіцэра ДАІ вінаватая і сама сістэма

У беларускай міліцыі паказуха і піяр важнейшы, чым рэальная барацьба з крыміналам.

Пра гэта піша Telegram-канал NEXTA ў каментары аб выкраданні і забойстве афіцэра ДАІ:

«Пакуль забойцаў шукаюць, супрацоўнікі міліцыі нам пішуць. Як былыя, так і дзейныя. Усе лісты мы прыводзіць не можам, але болі ў іх вельмі шмат. Галоўная думка такая, што невядомыя пакуль забойцы - не адзіныя, хто вінаваты ў трагічнай смерці калегі. Вінаватая і сама сістэма, у якой паказуха і піяр важнейшыя, чым рэальная барацьба з крыміналам.

- Я б назваў гэтую гібель на службе «вынікам аптымізацыі», - распавядае адзін з супрацоўнікаў. - У сістэме МУС цяпер катастрафічна бракуе людзей, праз што астатнім даводзіцца парушаць інструкцыі і працаваць з рызыкай для жыцця. Акрамя планавага скарачэння колькасці, падкасіла шэрагі і абавязковая праверка на паліграфе, праз што, напрыклад, участковых і інспектараў ДПС стала катастрафічна бракаваць. Дайшло да таго, што сталі практыкаваць камандзіроўкі ў суседнія раёны.

Чаму ж беларускія міліцыянты так масава «зразаюцца» падчас тэставання на паліграфе? Гэта нам патлумачыў іншы супрацоўнік, які таксама пажадаў застацца невядомым.

- Працую ўчастковым у невялікім мястэчку, і там, дзе па штаце пакладзена 12 чалавек на ўчастак, нас толькі двое, - піша ён. - Мы даслоўна спім па 3-4 гадзіны, бо трэба не толькі з усімі справамі разабрацца, але і стос паперак запоўніць, усё пераправерыць. Інакш - спагнанні. І нам зразумела, чаму забіты хлопец паехаў на разгляд адзін - проста таму, што на такіх маладых і скідваюць усю цяжкую і брудную працу. Напарніка, старэйшага па званні і досведу, адпраўляць з ім ніхто не стане. А з паліграфам усё вельмі проста: гэта наступствы ўсіх спробаў заставацца чалавекам. Да прыкладу, часам спынены за дробнае парушэнне кіроўца на трасе «дзеліцца» з супрацоўнікам ДАІ 4-5 літрамі бензіну або саляркі. Гэта не хабар - проста паліва выдаюць недастаткова, каб выконваць усю працу. Але падчас праверкі на паліграфе адразу ўзнікаюць падазрэнні, і са службай даводзіцца расставацца.

Акрамя таго, адзначаюць міліцыянты, пад «аптымізацыю» падпадае менавіта «вулічная пяхота» - тыя, хто непасрэдна павінен змагацца са злачыннасцю і абараняць грамадзян. Ідэолагаў, прапагандыстаў, фінансістаў, тылавікоў, вялікіх спецыялістаў у перакладанні паперак і мацерных крыках на падначаленых скарачэнні па-шуневіцкі чамусьці кранулі менш за ўсё. Непасрэдны вынік такой кадравай палітыкі ўсе мы ўчора бачылі. Зрэшты, тыя, хто прымае пастановы, самі пад кулі не лезуць і ў адзіночку пешшу па шашы не ходзяць, а сядзяць ва ўтульных штабах», - адзначае NEXTA.