Вайскоўцы і блокпосты: абстаноўка ў Магілёве пасля забойства супрацоўніка ДАІ

НЗ ускалыхнула абласны цэнтр.

Лейтэнант міліцыі Яўген Патаповіч загінуў у чацвер у Магілёўскай вобласці пры выкананні службовага абавязку, піша mogilev.online.

НЗ ускалыхнула абласны цэнтр з учорашняга вечара, на ўстанаўленне абставінаў гібелі 22-гадовага супрацоўніка ДАІ Яўгена Патаповіча, цела якога знайшлі ў чацвер вечарам у некалькіх кіламетрах ад Магілёва ў лесе, кінутыя ўсе сілы.

На дапамогу следству прыцягнутыя вайскоўцы. Са слоў відавочцаў, прыкладна а дзявятай раніцы да лесапаласы, дзе было знойдзенае цела лейтэнанта міліцыі, пад'ехалі дзве машыны і адзін аўтобус з вайскоўцамі. Людзі ў форме накіраваліся ў лес прачэсваць мясцовасць.

У самім Магілёве пасля рэзананснай падзеі супрацоўнікі міліцыі дагэтуль працуюць ва ўзмоцненым рэжыме. Ва ўсім горадзе на дарогах выстаўленыя блокпосты, прадаўжаецца праверка аўтамабіляў. Праваахоўнікі працуюць у парах. На некаторых адцінках магістраляў - у бронекамізэльках і касках.

Мала хто з жыхароў горада не ведае, што сталася. У людзей стан здзіўлення, а ў некаторых - і страху. Многія не вераць, што ў адносна спакойным і ціхім Магілёве магло такое адбыцца.

«Падзея беспрэцэдэнтная, я такога не памятаю. Складана меркаваць, што менавіта здарылася. Нахабнае злачынства. Калі як пішуць - супрацоўніка запіхнулі ў аўтамабіль, так жорстка адпомсцілі, то гэта кашмар проста. Што ў гэтых людзей можа быць чалавечага?» - падзялілася абураная магіляўчанка Аксана Савіцкая.

«Дзіця. 22 гады. Я маці дарослага сына. Страшна неяк», - выказалася Алена Качубар.

Нейкіх афіцыйных заяў аб ходзе пошукаў забойцаў магілёўскага супрацоўніка ДАІ ва УУС Магілёўскага аблвыканкама пакуль не робяць. Праваахоўнікі просяць усіх, каму штосьці вядомае, паведамляць у міліцыю і абяцаюць, паводле некаторых крыніц, за інфармацыю ўзнагароджанне.