Кіраўнік СБУ Васіль Грыцак падаў у адстаўку
1- 20.05.2019, 10:16
- 9,977
Рапарты аб звальненні з займаных пасад складзеныя усімі намеснікамі кіраўніка СБУ і чальцамі ягонай каманды.
Кіраўнік Службы бяспекі Украіны Васіль Грыцак падаў у адстаўку, паведамляе прэс-служба СБУ.
У паведамленні гаворыцца, што рапарты аб звальненні з займаных пасад складзеныя ўсімі намеснікамі кіраўніка СБУ і чальцам каманды Грыцака. Чальцы, якія падалі ў адстаўку, адзначылі, што ўсведамляюць права новага прэзідэнта Украіны ініцыяваць кадравыя змены ў кіраўніцтве СБУ.
«У супрацьстаянні з ворагам СБУ страціла 27 супрацоўнікаў. У той жа час, нават боль страт рабіў нас мацнейшымі. Паводле ўзроўню прафесіяналізму Служба бяспекі Украіны ўжо адпавядае найлепшым спецслужбам свету, і калектыў службы ганарыцца такой высокай ацэнкай з боку нашых заходніх партнёраў», - адзначыў Грыцак.
Ён заявіў, што за час працы СБУ спыніла «шматлікія спробы расейскага агрэсара штучна раздуць полымя сепаратызму» ва Украіне і распаліць канфлікты «на міжэтнічнай і міжрэлігійнай глебе».
Грыцак стаў кіраўніком СБУ ў 2015 годзе. Ён працаваў ва ўстанове з 1990 года, узначальваў Кіеўскую абласную і гарадскую ўправу службы. У 2009 годзе перайшоў у цэнтральнае кіраванне. У ліпені 2014 года Грыцак стаў кіраўніком антытэрарыстычнага цэнтра пры СБУ - першым намеснік кіраўніка ўстановы.
Раней у адстаўку падалі сакратар Рады бяспекі Украіны Аляксандр Турчынаў і міністр замежных спраў Украіны Павел Клімкін. Таксама перад інаўгурацыяй абранага прэзідэнта Украіны Уладзіміра Зяленскага звольніцца надумалі прадстаўніца прэзідэнта Украіны Пятра Парашэнкі ў Вярхоўнай радзе Ірына Луцэнка і віцэ-спікер Рады Ірына Герашчанка.