У Фінляндыі ўпершыню пройдуць «дзіцячыя выбары» ў Еўрапарламент

У кожнага кандыдата будуць свае характэрныя асаблівасці.

Дзеці ў Фінляндыі ў гэтым годзе змогуць нароўні з дарослымі ўзяць удзел у выбарах у Еўрапарламент - праўда, кандыдаты ў іх будуць асаблівыя, піша «Еўрапульс».

У дзень галасавання ў бацькоў будзе магчымасць узяць дзяцей з сабой на выбарчыя ўчасткі, дзе побач з пунктам галасавання для дарослых будзе пункт дзіцячага галасавання. Там юныя фіны змогуць аддаць голас за аднаго з шасці кандыдатаў - уяўных звяроў, якія хочуць трапіць у Еўрапарламент. У кожнага кандыдата свае характэрныя асаблівасці: напрыклад, конь Холм «не спыняецца ні перад якімі перашкодамі», а пугач Пасі - «мудры чараўнік, які прыслухоўваецца да меркавання іншых».

Вынік выбараў будзе вядомы праз тыдзень пасля дня галасавання. Ад імя пераможцы ў Еўрапарламент адправіцца прывітанне, а маленькія выбарцы атрымаюць вясёлае заданне ад кандыдата, які перамог. Яно будзе апублікаванае на сайце «дзіцячых выбараў».

Выбары для дзяцей пройдуць у Фінляндыі з размахам - у 40 муніцыпалітэтах па ўсёй краіне. Упершыню «дзіцячыя выбары» прайшлі на мясцовых выбарах у горадзе Поры ў 2017 годзе.

Такія выбары-трэнінгі для тых, хто яшчэ занадта малады для ўдзелу ў сапраўдных выбарах, праводзяцца і ў іншых краінах ЕЗ. Напрыклад, у гэтым годзе перад выбарамі ў нацыянальны парламент у Даніі ўпершыню прайшлі нацыянальныя выбары для школьнікаў ад 13 да 17 гадоў.

Выбары ў Еўрапарламент пройдуць у гэтым годзе з 23 да 26 траўня ва ўсіх краінах Еўразвязу.