У Менску запускаюць аплату за праезд банкаўскімі картамі

Кантроль аплаты будзе такім жа, як і ў выпадку з электроннымі праязнымі.

«БПС-Ашчадбанк» з 23 траўня запускае ў рэжыме доследнай эксплуатацыі сэрвіс аплаты за праезд у наземным транспарце Менска з дапамогай банкаўскіх картак, паведамляе belmir.by.

Падчас пілотнага праекта тэхналогія будзе даступная на трамвайным маршруце №6, які курсуе паміж Серабранкай і Зялёным лугам.

Праект адкрыты, так што плаціць за праезд можна будзе бескантактавай картай любога банка. Сэрвіс падтрымлівае аплату картамі сістэм Visa, Mastercard і «Белкарт» (кобейджынгавые карткі Белкарт-Maestro з бескантактавым інтэрфейсам).

Акрамя таго, можна будзе разлічыцца ў транспарце з дапамогай смартфона, бірулек, гадзіннікаў і іншых мабільных прылад з падтрымкай тэхналогіі NFC.

Спачатку сэрвіс будзе даступны ў 30 трамваях сталічнага маршруту №6. Пры паспяховай рэалізацыі пілотнага праекта «БПС-Ашчадбанк» плануе маштабаваць сэрвіс на ўвесь грамадскі транспарт Менска.

Працэс аплаты просты: трэба дастаць карту для аплаты і паднесці яе да валідатара, дачакацца гукавога сігналу і тэкставага паведамлення. Кошт разавага праезду роўны кошту звыклага папяровага талона - 60 капеек.

Вывучыць гісторыю паездак і расходаў можна ў асабістым кабінеце пасажыра на сайце сістэмы. Там жа можна будзе ўдакладніць статус банкаўскай карты і атрымаць электронны карт-чэк. Тут таксама будуць адлюстроўвацца паездкі, аплачаныя на турнікетах сталічнага метрапалітэна.

Кантроль аплаты будзе такім жа, як і ў выпадку з электроннымі праязнымі. Пры праверцы трэба будзе паднесці да тэрмінала банкаўскую картку, пасля чаго на ім адлюструецца інфармацыя аб факце разліку за праезд у канкрэтным транспартным сродку.

Са слоў выканаўчага дырэктара «БПС-Ашчадбанка» Марыны Асіпоўскай, магчымасць аплаты бескантактавымі карткамі праезду у наземным транспарце з'явіцца напярэдадні II Еўрапейскіх гульняў у Менску.

Пілотная зона адкрываецца 23 траўня на самым працяглым і пасажыраёмістым трамвайным маршруце. Паэтапны фармат дазволіць старанна адпрацаваць тэхналогію і пасля маштабаваць яе на ўвесь грамадскі транспарт горада.

- Тым самым Менск увойдзе ў лік сусветных сталіц, у якіх можна аплаціць праезд карткай або смартфонам як у метро, так і ў аўтобусах, тралейбусах і трамваях, - патлумачыла выканаўчы дырэктар.

Пілотны праект рэалізуе «БПС-Ашчадбанк» разам з Менсктрансам і IBA Group. Укараненне сервісу не запатрабавала дадатковых асігнаванняў са сталічнага бюджэту.

Раней «БПС-Ашчадбанк» рэалізаваў сэрвіс бескантактавай аплаты на турнікетах усіх станцый менскага метро. Сэрвіс быў вельмі папулярным сярод пасажыраў: з яго дапамогай ужо разлічыліся больш за 12 млн раз.

У сістэме аплаты зарэгістраваныя плацяжы картамі, выпушчанымі ў 189 банках з 63 краін свету.