17 чэрвеня 2019, панядзелак, 2:57
Мы ў адной лодцы
Рубрыкі

«Калі МУС не выбачыцца, магчымы сацыяльны выбух»

ФОТА: «РАДЫЁ СВАБОДА»

Экспэрты ацанілі сітуацыю з расследаваннем смерці магілёўскага інспектара ДАІ.

Экспэрты ацанілі версію Следчага камітэта, згодна з якой прычынай смерці супрацоўніка ДАІ ў Магілёве стаў суіцыд.

У сувязі са справай аб гібелі 22-гадовага Яўгена Патаповіча ўзнікла і іншае сур'ёзнае пытанне. Шукаючы магчымых забойцаў, супрацоўнікі міліцыі затрымалі сотні цыганоў, многія з якіх правялі за кратамі некалькі дзён. Першы намеснік міністра ўнутраных спраў Іван Падгурскі, на пытанне, ці варта МУС папрасіць прабачэння ў цыганоў, адказаў: «Можа быць, і трэба. Не ведаю, ці будзем».

«99%, што гэта не суіцыд»

Праваабаронца і былы следчы пракуратуры Алег Воўчак у каментары UDF.BY выказаў вялікія сумневы з нагоды версіі Следчага камітэта.

«99%, што гэта не суіцыд. Сумнеў выклікае жаданне інспектара ДАІ сысці з жыцця такім спосабам. Так, суіцыды сярод супрацоўнікаў адбываліся і раней, але без такога заблытанага маскавання», - сказаў Воўчак.

Праваабаронца мяркуе, што пасля масавых затрыманняў цыганоў МУС трэба «не разважаць, а неадкладна прасіць прабачэнне».

«Мала таго, што ўжывалася фізічная сіла. Затрыманні на перыяд больш за тры гадзіны былі незаконнымі. Складаліся ліпавыя адміністрацыйныя пратаколы аб хуліганстве і знаходжанні ў нецвярозым стане», - адзначыў праваабаронца.

На думку Алега Воўчака, сваё слова ў гэтай сітуацыі павінен сказаць генеральны пракурор Аляксандр Канюк.

«Пракуратура абавязана ўнесці прадстаўленне. Мы ўбачылі відавочную дыскрымінацыю пэўнай групы грамадзян Беларусі. Для затрымання павінны быць падставы, а браць агулам - гэта патыхае 1937 годам, калі хапалі ўсіх запар», - мяркуе Воўчак.

Але, на ягоную думку, дзеянні пракуратуры залежаць ад таго, які сігнал дасць правадыр краіны.

«Думаю, гэта справа на кантролі ў Лукашэнкі і цяпер усё залежыць ад яго. Мяркую, што ўладам трэба папрасіць прабачэння, каб зняць напружанне. Заўтра адбудзецца яшчэ якое-небудзь забойства, праскочыць левая інфармацыя, і што - пачнуць хапаць усіх украінцаў сярод грамадзян Беларусі? Ці літоўцаў? Напружанне можа назапашвацца і прывесці да сацыяльнага выбуху. Таму выбачацца абавязкова трэба», - сказаў праваабаронца.

«Стае довадаў таго, што гэта сапраўды было самагубства»

Генерал-лейтэнант міліцыі ў адстаўцы Мечыслаў Грыб у каментары UDF.BY выказаў іншае меркаванне з нагоды версіі Следчага камітэта пра суіцыд інспектара ДАІ.

«Падчас маёй доўгай працы ў міліцыі даводзілася сутыкацца з суіцыдамі супрацоўнікаў. Яны, мабыць, былі і не вельмі падобнымі на магілёўскі, але ў жыцці можа быць усялякае. Пасля агучаных у СМІ довадаў адназначна сказаць, што гэта было не самагубства, а забойства, у мяне падстаў няма», - адзначыў Грыб.

Генерал-лейтэнант у адстаўцы пералічыў довады, якія сведчаць пра самагубства.

Па-першае, забойцы супрацоўніка міліцыі, як правіла, забіраюць з сабой яго зброю. Тут жа пісталет застаўся на месцы. У ім не стае аднаго патрона, а забойства адбылося з гэтага пісталета.

Па-другое, на руках загінулага маюцца ёсць сляды нагару, які заўсёды застаецца ад стрэлу. Па-трэцяе, з нагоды пытанняў дроў і вогнішча - ёсць сведчанні работнікаў крамы, што інспектар сам купляў дровы.

«Стае довадаў таго, што гэта сапраўды было самагубства», - рэзюмаваў Грыб.

«Іншая справа, што яшчэ трэба абавязкова разабрацца, з якіх прычын супрацоўнік наважыўся на такі крок - праз падзеі ў асабістым жыцці або ўмовы службы? Ці ў яго была іншая прычына?», - адзначыў генерал-лейтэнант міліцыі ў адстаўцы.

Пра тое, як паводзіцца кіраўніцтву МУС пасля масавых затрыманняў цыганоў, ён не сумняваецца.

«У сваёй працы я заўсёды думаў, што калі супрацоўнікі МУС дапусцілі памылкі, то перад людзьмі трэба выбачацца. Ва ўсялякай форме - пісьмовай або вуснай - але папрасіць прабачэння трэба. Не думаю, што для затрымання цыганоў былі важкія падставы», - сказаў Грыб.