Аляксандр Грыгароў: Спрэчкі з акцыямі «Дынама»? Скончыліся фінансы ў Чыжа

Былы міністр спорту пракаментаваў сітуацыю вакол менскага «Дынама».

Былы міністр спорту Аляксандр Грыгароў выказаў "БП" сваё меркаванне наконт таго, што 20 гадоў бізнэсовец Юрый Чыж нібыта незаконна валодаў менскім футбольным клубам "Дынама".

- У вашу бытнасць у Мінспорту ў розных статусах узнікалі нейкія пытанні пра законнасць ці незаконнасць набыцця акцый Чыжом?

- Наогул пра гэта размова не ішла! Федэрацыя футбола стала самастойнай структурай і нам як бы казалі ў яе справы не ўмешвацца. Мы пярэчылі, таму што зусім не мець дачынення да футбола не маглі. Але ў камерцыйныя пытанні сапраўды ніколі не ўмешваліся.

- Як думаеце, а чаму цяпер гэтыя спрэчкі з акцыямі пачаліся? У Юрыя Чыжа хочуць бясплатна забраць футбольны клуб? І на беларускі суд у гэтым сэнсе можна спадзявацца...

- Мне здаецца, усё ўпіраецца ў грошы. Скончыліся фінансы ў Чыжа. Ці не скончыліся, а проста стала менш. Раней ён досыць шмат выдаткоўваў грошай на клуб, утрымліваў каманду. Мабыць, пасля вядомых падзей і ўсіх спрэчак сродкаў стала менш.

- Чыж казаў, што плануе прадаць пакет акцый за мільён беларускіх рублёў ...

- Напэўна, купцоў не знайшлося. Хоць, калі гаварыць шчыра, для футбола паўмільёна даляраў - гэта невялікія грошы. Бюджэт футбольных і хакейных каманд вылічаецца вялізнымі лічбамі. Так што паўмільёна ў гэтым выпадку - гэта не грошы. Можа, проста ахвотных няма купіць - гэта ўжо іншае пытанне...